‘I’ila atina’e a le malo ae leai se fesoasoani o maua mai ai

By Pai Mulitalo Ale 07 September 2016, 12:00AM

Ua silia ma le sefulu tausaga talu ona nonofo le tamā i a Iosefo Fruean ma lona to’alua i a Loimata i le afio’aga o Luatuanu’u. 

O le aso ananafi na asia ai e le Fofoga o Samoa le tamā i a Iosefo ma le faletua mo so la finagalo fa’aalia  i le soifuaga o lo’o i ai nei. 

Na saunoa Iosefo, o lona ia lava manatu i lo tatou malo o lo’o i ai nei - ‘e manaia lava le ‘i’ila o mea lea e fai e le malo, lelei mea uma, ae leai lava ma se fesoasoani e maua mai ai. 

“A lē tagi lava le tagata i ona lima e leai se mea e maua, a’o se upu i le malo, ia e misi. 

“Ua matua’i manaia lava faiga a le malo lea ua i ai, ua ‘i’ila ma matagofie le taulaga ma fe’ilafi ai mea uma i totonu o le atunu’u a’o se upu o le fesoasoani mai , e  leai, o lea lava e alu le tagata lava  ia e su’e lona olaga, e le’o fa’apea o fa’alagoalgo atu se isi i le malo. 

Sa fa’ailoa e Iosefo, afai o manuia ai se tagata o le atunu’u, o lona uiga e na’o latou lava o lo’o i le malō, minisitā ma faipule a’o se upu i tagata ta’ito’atasi e leai se fesoasoani.

“Aemaise lava tatou e tua lava le tagata ia i a te ia, a lē tapatapa atu lava i le lo’omatua tapa mai le lo’omatua ia ta ita…a’o se upu e tapa atu i le minisita e leai la se mea fa’apena.

Na fesiligia Iosefo i le fesoasoani a le tofi o le itumalo. 

“Ona o a’u e palota afakasi, e leai lava sa’u mea na maua mai ai.

“I le taimi a’o o’u i Faleula sa maua ai le tulaga lena, uma loa le palota fa’asoa mai le taga alaisa, pusa’apa suka ma isi mea fa’apena, ae i le taimi lenei, e le’o toe iai se mea fa’apena. 

“E uma loa le faiga palota, e  fiu e toe fa’atali le sui ua le toe o’o mai, ae a fetaui i ai pei lava lua te le masani, pei o le tulaga lea e le mafai ai ona fa’amoemoe i se sui faipule aua le atina’ega o lo’u aiga.

E ui i le tulaga tau fesoasoani, na fa’ailoa foi e le tinā o le aiga le faigata o le soifuaga o lo’o feagai ai nei ona o le tele o fa’alavelave. 

“O le isi itu, o lo tatou atunu’u e le mafai ona tatou tu’ua le mea e tatau ona fai, o le tagata osi aiga ma le loto alofa e le mafai ona tu’ua le mea e ao ona fai. 

“E tusa lava po’o le a le tele o fa’alavelave, e ‘ave lava la’u fa’amuamua i ai ona o le tautua i le aiga.

O le tinā i a Loimata ma le tamā i a Iosefo e auai i le Ekalesia a Iesu Keriso o le Au Paia o Aso e Gata Ai. 

Na fa’ailoa le agaga fa’afetai o Loimata ona o le galuega fesoasoani a la latou Ekalesia aemaise lava mo ‘aiga e lima vaivai. 

“E fesoasoani lava la matou Ekalesia i a matou lava ia, a i ai se fa’aletonu i totonu o aiga o le Ekalesia, ia ona aga’ atu lea o le Epikopo ma ona fesoasoani e fa’asoa le fesoasoani i aiga ta’itasi o le Ekalesia. 

O lea fesoasoani na ta’ua e le tinā i a Loimata e le fa’apea e na’o tagata o le Ekalesia Mamona e o’o i ai, e fa’asafua lava i tua i nai tinā ma tamā matutua o isi Ekalesia lea o lo’o mo’omia le fesoasoani. 

Na saunoa foi Loimata e i ai foi le fa’alapotopotoga o le Relief Society a la latou mafutaga tinā e latou te fa’atinoina lea fo’i tulaga. 

Ae mo i latou lava ia e silasila lava i aiga e talafeagai ona fesoasoani i ai. 

Na fa’ailoa fo’i e Loimata le fesoasoani mai ai nisi o le fanau ma aiga mai atunu’u mamao. 

E ui la i fa’afitauli, ae o lo la talitonuga - o Samoa o lo’o ola i se olaga sa’oloto. 

By Pai Mulitalo Ale 07 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>