O se vaitaimi o le tausaga talu ai, na saisai ai e se Samoa le-mafaufau se tama’ita’i mai Ausetalia, tauva’a lona fofoga ae fa’amalosi ma fai iai uiga mataga a’o pulapula iai mata o si ana uo-tama na la malaga fa’atasi mai mo se tafaoga i Samoa nei. 

O le taimi nei, o lo’o fai a la sa’iliga-seleni, ia mafai ai ona malaga mai e fa’amatala ma tu’uina atu a la molimau fa’asaga i le na faia ia aga le-migao. Lea fo’i fa’atoa fa’amatala e la’uā, mo le taimi muamua, gaioiga a le pagota lea sa fa’a’aupegaina i se seleulu ma faia ai se feusua’iga fai-fa’amalosi a’o le’i sola-‘ese ma ‘ave-fa’amalosi uma tupe ma isi mea-aoga a le to’alua lea mai Ausetalia.

Na matua fa’ate’ia le atunu’u ina ua tupu o lena mea ae maise, o lea ua fa’amatala tonu e la’uā le mea moni na tupu, e mautinoa ai, ua so’o tulu’iga uma o le lalolagi, i le mataga tele ma le mata’utia o a’afiaga ma tu’ua’iga, ua tilofia ai nei, lenei atunu’u.

Ae moni lelei ma fa’amaoni, o amioga fa’apenei, e matua ta’uvalea ai le mau taumafaiga o faia nei, e tau fa’atosina mai ai tagata maimoa mai fafo i o tatou laufanua. O le popolega tele, ona ua le-tasi se mea-mataga fa’apea ua tupu i o tatou lau’ele’ele e o’o mai i lenei taimi. 

Silasila fo’i i nai aso e le’i atu nei mo se fa’ata’ita’iga. Na fa’asalalauina i le itulau pito i luma o le Weekend Samoa, se tala i se tasi ali’i-talavou mai Taufusi, fa’apea na tui e se tasi i se naifi (po’o se isi mea-ma’ai) i se po i le taulaga ma i’u ina maliu ai lava.  

Na ta’ua e se tasi na va’ai-tino i lenei fa’alavelave, o le ua maliu, na fa’aali iai le fia-totoa fia malolosi o isi ali’i talavou e to’atolu lea sa taofia ai lava ma o lo’o ‘ai-ga’o ai pea e o’o mai i le taimi nei. E fa’apea le tala, o le ali’i Taufusi lea  sa eva i se fale-kalapu i le afiafi lea ma tupu ai se fe’ese’esea’iga. Na tuli i fafo ma le fale-kalapu, ona fa’aauau ai lea o fusu’aga i luga o le ‘auala-tele a le malo, o i’ina na ta-tui fa’afia ai le ua maliu i se ‘aupega ma’ai.

Ae silasila fo’i Samoa, o le maliu lea i le Aso Faraile talu ai, o le lona lua lea o fa’alavelave matuia na ripotia, fa’apea na amata mai i se fale-kalapu i nai aso e le’i leva atu.  

I le amataga fo’i le tausaga lava lenei, na falepuipui ai nisi ali’i-talavou mo le ta’i-fa tausaga, ona o le fasiga o se tama-a’oga mai Fiti ma tia’i-matapogia ai lava i fafoa ane o se fale-kalapu fo’i.

I fa’amaumau a le Ofisa o Leoleo, o le na a’afia sa eva ma ana uo i se fale-kalapu i le taulaga i le po. Na aga’i ane i fafo le na a’afia ma i’u ina tau-‘upu ai ma Wilson ma Mafi ma tu’i ai loa e se tasi o le to’alua lea, le gutu o le tama-Fiti. 

Na toe fo’i si ali’i-Fiti i totonu o le fale-kalapu, a o le tulua-o-po-ma-ao, na savavali mai ai ma ana uo o le a aga’i i le fale, ae osofa’i ai e Wilson ma Mafi ma le latou vaega. Na mafai ona sosola ‘ese isi uo a le tama-Fiti ae maua to’atasi ai loan a o le na a’afia, ma fasi fa’amo’amo’a ai loa e tamaiti-totoa nei.  Fa’atoa tu’u lava ina ua le-iloa e se tama-Fiti o se mea, na matapogia, ae sosola loa tama-Samoa totoa.

Sole! O amioga lava nei ua fa’amaonia ai le mea ua leva ona tatou iloa, o se fa’ama’I mata’utia ua tatau ona tafi-‘ese mai lenei atunu’u.  

Ae ua silafia lelei fo’i, o uiga nei ma mea fa’apea, e le fou ia tatou. E tutupu pea lava pea i lea taimi ma lea taimi ma e le na o Samoa fo’i e maua ai. Ua tutupu so’o ma ua tatau ia tatou uma -  o Samoa ao-uliuli ona silasila toto’a iai mo se fofo.

O le fesili: O le a ea le mea ua fa’apea ai nei tagata? Fea ua aga iai Samoa, o se atunu’u e lolotu ona tagata ma to’a’aga e ta’uta’u Le Atua? Fea le fa’aaloalo, le ava-fatafata ma le va-fealoaloa’i o mita’i nei? 

Afai e le-tau lau silasila ma le fa’afofoga i tala ua fa’matala atu, toe silasila ane i le Sunday Samoan i le itulau pito i luma, i le tala o lo’o fa’aulutalaina, “Se Vaega Tau Fa’amata’u po’o ni Tupulaga fia-a’ai?”, e fa’amaonia atili ai le mata’utia ua tatou o’o nei iai. 

O lo’o momoli atu i lea tala, se lapata’iga tele mo le mamalu o lo tatou atunu’u, ona o aga a tupulaga o lo’o ta’amimilo solo nei i le taulaga i Apia, e mata’utia le fa’atupu fa’alavelave, fasi tagata ma fa’ao’olima, gaoi o mea’ai ma so’o se mea-aoga lava e tau atu iai.

O kegi nei a tupulaga talavou, ua matua fa’atupu-vevesi, fa’atupu-popole fo’i i tagata ta’ito’atasi e masani ona asia ta’ito’atasi le taulaga, ae o’o fo’i i pisinisi ma faleoloa, o lo’o matua atu-popole ona o le fa’atupu-misa fa’atupu vevesi o nei tagata ae maise fo’i o le tele o le fa’aleagamea i meatotino ma mea-taugata e le ‘au-maua. 

“Sa matou a’ai ma la’u uo ma lona to’alua i o (maota o le malo) ae te’i lava ua tu’i ai se tamaiti o le kegi lea a tamaiti-tata’a, lo’u to’alua,” o le fa’amatalaga lea a Jay Retzlaff i le Sunday Samoa. 

“E leai se mea sese na matou fai. Na o-mai lava fao atu le matou pizza ma coke ae ‘ai, uma tau’ai atigi-fagu i le matou ta’avale… na taumafai lava fo’i e tau-tatala le ta’avale ae gaoi isi a matou mea sa i totonu. E le gata i lea, ae na sosola fo’i ma gaoi a matou telefoni. 

 “Nei lava tama’i-tamaiti pe 14 – 19 tausaga, ae nonofo ta-kiki  ma ta-tu’i lo’u to’alua ma palalauvale iai ma fa’afefe latou te fasiotia o ia. E fa’afetai ona sa matou tulioso i le ta’avale ma fa’atotope-‘ese loa i le Ofisa o Leoleo…” 

O le mea fo’i lea na tupu ia Gordon Viliamu o Luatuanu’u i le po lava lea.

“O lo’u fo’iga mai i le fale’aiga o Pinati, sa ‘ou alu e fa’atau mai se mea’ai, ae osofa’i ai au e le kegi lena,” o le fa’aaliga lea a Gordon. “E to’alua sa tutu i le isi itu o le ‘auala-laupapa (i luma o Mulivai) ae pe to’asefulu isi sa i le isi tulimanu. ‘Ou te le’i ano lava la iai, ae na ‘ou te’i i lo’u pa’u i lalo, e tu’i mai a’u i tua. Na sosola ma ‘ave la’u mea’ai.”    

Ioe le atunu’u e, o nisi na o tala fa’amomoiloto, tala fa’anoanoa, lea ua fa’asolo lava ina fa’ateteleina. E le ‘asa se vaiaso ma se mea mata’utia, mea mataga fa’atiga-loto e tupu mai, o mea e le iloa ai se aga’i i luma o Samoa. 

Ae le foliga lelei fo’i mo se atunu’u e taulagi nei e fa’avae i a’oa’oga fa’aKerisiano, ae maise o ana tu ma aganu’u ma talitonuga fa’aSamoa. O aga-fa’apaupau nei o le fa’amimisa fia totoa ma le fa’atupu-fa’alavelave, e ta’u mai ai lava le mea moni, ma fa’ailo leo-tetele ai le mau fete’ena’iga o iai nei si o tatou atunu’u. Ae tu’u-maualalo i lalo le sao mata’ina, le sa’o lelei o isi sa fa’atino atoa ma isi o lo’o finau pea ma taumafai mo se manuia au-i-luma.  

O se fa’amanatu e toe ta-ta-logo fo’i Masefau i lenei aso. E iai lava le mea lea e le o atoatoa i totonu o lo tatou atunu’u. Le mea o lo’o misi, ua amata ai ona luluina le fa’atuatua ma fesiligia pea le mau fete’ena’iga o le soifuaga. 

‘Aua le ‘ese le mea e saunoa iai, ‘ese le mea e fa’atino. Ioe Tama’ita’i e, ma Ali’i, e matua le-tatau ai ma le-talafeagai nei mea uma ua va’aia i Samoa. E le-tatau lava ona tutupu.

Silasila fo’i, a afaina ma so’ona fai fa’apea se tagata-asiasi mai e pei o si tama’ita’i Ausetalia lea, o lona uiga, e ta’u mai ai, e iai le fa’aletonu tele lava e i lo tatou nei atunu’u. O le ta-tui o se tagata ma le mana’o e fa’ao’olima ma sauaina  ona o mea’ai po’o a lava, o se fa’ama’i-matuia tele ua aligaliga, ua tatau ona fai iai o se fa’atatau. 

O le fesili, o fea o tatou ta’ita’i? 

O fea ea ta’ita’i o le malo, ekalesia, o nu’u fa’apea ta’ita’i o aiga?

O tofafa ea tofa ae momoe moe? 

Tatou i Samoa nei, ioe o tulaga masani lava e pei fo’i o isi mea uma. O le talofa e lava e tasi.   

A o le fa’afitauli tele lena o aso nei.

Foliga ua tatou le-manana’o e feagai ma ni mea sese ma ni mea-leaga; ua tatou  talia ai lava pei o le tala a le isi ‘olomiti,  ona pau o le soifuaga lava o le natura!  

Fea au tu ma aga masani. Le a le mea ua tupu i le fa’autautaga ma le mafaufau tatau? Le a lo ta tulaga o iai nei? Fea Le e Sili a’o iai nei mau mea ua tutupu? O toe ano ea iai se tagata?