Fai le mea o lo’o mo’omia

07 March 2016, 12:00AM

Ripotia e Deidre Fanene

Fa’aliliu e Maiava

 

Ua toe tula’i mai Sala Fata Pinati ina ua manumalo i le palota a le Itumalo o Gaga’emauga Numera 1, ae ‘aua ne’i iai se finagalo a-mea o iai se lisi-‘umi a le tamaloa, o mea e fa’atino mo lona itumalo.

Na momoli lana fa’afetai ona o le tali a le Matai Sili i le Lagi i le palota o lona itumalo peita’i, e le fia fa’aalia sona finagalo mo galuega fuafua mo le lumana’i.

“O a’u nei e leai ni a’u fuafuaga po’o ni mea e folafola atu e fai,” o lana saunoaga lea.

 “Po’o le a lava le mea ‘ou te va’ai atu e mo’omia ona fa’alelei, o le mea lena ‘ou te fa’atino ma e fa’apena fo’i i lo’u itumalo. O a lava mea latou te mo’omia, o le a ‘ou fesoasoani i so’o se mea ‘ou te mafaia mo latou.”

E to’atolu sui o le itumalo lea sa tauva i le palota, o Sala, Tuala Joseph Ponifasio ma Sala Iose McCarthy.

Na ta’ua e Sala, e leai sona finagalo e fa’aalia i lenei taimi pau lea o le Vi’ia o Le Ali’i, ona ua manuia le palota ona o le lagolago a lona itumalo.  

 “E leai so’u manatu e fa’apea le taunu’uga o le palota, aua na ‘ou fai lava i tagata o lo’u itumalo, o ai lava o le a manumalo i le palota, ou te lagolagoina lava,” o lana fa’aaliga lea.

“Ae te’i ua ‘aumai le fa’ai’uga o le palota, na o le fa’afetai lemu ifo lava i Le Atua mo le toe filifilia o a’u mo le tofi.” 

I le taimi nei lava, e foliga o lo’o fiafia lava le loaloa o le itumalo ona o la latou filifiliga ua faia.

Na ta’ua e Tunaimati’a Vaifale Viane, o se matai o Le’auva’a, ua fetaui lelei ma ua talafeagai lava le manumalo o Sala, ona ua tele aso o tautau mo le itumalo i so’o se ‘auala. 

 “O le vala’auina o se tagata e mai Le Atua, Na te musumusuina agaga o tagata ia palota mo le tagata e loto-alofa ma agalelei ma le fa’ailoga-tagata fo’i,” o lana fa’aaliga lea. 

“Sa fesoasoani malosi Sala i so’o se tasi, ae maise aiga ta’ita’i ma tupulaga talavou sa sa’ili galuega atu iai mo le tausiga o aiga.

“Ua tele ana galuega lelei ua faia mo le itumalo ma o le taui lea o ana galuega lelei, ua toe palota iai tagata o le itumalo.

Na ta’ua e Tunaimati’a, sa fiafia tele ona o le sologa malie ma to’afilemu mea uma i le taimi o faiga-palota, leai se fa’aletonu na aliali mai.

 “E momoli fo’i le fa’afetai ia Tuala Ponifasio ma Sala Iose ona o le manaia tele o lenei palota.

“Ia ‘ae pei lava o ‘upu masani, ‘e le mua uma ni va’a,” o lana tu’u-alalo lea.

Na ioeina fo’i ma lagolago e Vaifale Atapito le finagalo o Tunaimati’a.

“E leai se isi lagona e na o le ‘ave o le mua ma le vi’iga o le Atua ona o lenei aso ua i’u i le manuia, ua toe tula’i mai si o matou sui i le nofoa o le itumalo,” o lana fa’aaliga lea.

“’Ou te talitonu lava o le lagona lava lea i e uma o le itumalo sa lagolagoina le Afioga a Sala, ia tatou alo la’ia e lagolago ma ‘ave iai le fa’amalosi’au i le isi lima tausaga o muamua.

 “’Ou te talitonu lava e ao ona tu’u-tasi o tatou fa’atuatuaga uma i Le Atua ma e tatau fo’i ona fa’apena lo tatou itumalo aoao, ia fa’amuamua le Atua i lenei lima tausaga ua savalia.”

Na fa’afetaia fo’i e le Tulafale le Afioga a Tuala Ponifasio ma Sala Iose, o le lototetele e finau i lenei palota.

“Matou te tatalo i Le Atua, ia fa’atasi atu Lona Mana ma ia fa’amanuia atu ia la’ua uma.

“Ae alo maia, tatou taufai lagolago le sui ua ‘aumai e Le Atua ma ia iai pea i o tatou luga uma ana fa’amanuiaga i lenei lima tausaga.” 

07 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>