Ripotia e Lanuola Tusani Tupufia

Fa’aliliu e Maiava 

Ua iai nei le Sui Ta’ita’i o le Vaega Fa’a’Upufai e Puipuia Aia a Tagata (le HRPP), e lagolago ia Tuila’epa Sa’ilele Malielegaoi – lea ua toe filifilia e avea ma ta’ita’ia o le vaega. O ia lea o Fiame Naomi Mata’afa, le faipule o Lotofaga ua loa fo’i o avea ma Minisita o le Kapeneta,. 

Na manumalo Fiame ia Faumuina Tiatia Liuga – se tasi fo’i o sui tuai o le HRPP, i se palota fa’alilolilo a le vaega sa faia i le maota o le malo i le Aso To’ona’i, ina ua feiloa’i mo le ulua’i taimi, talu ona mae’a faiga-palota tele a le atunu’u. 

Na fa’ailoa mai e se tasi i le Samoa Observer, e felata’i lava le palota ma malo ai Fiame ia Faumuina, e 21 i le 19.   

E leai se fa’amaoniga ua ma’oti mai, pe o tofiga nei o le a avea ai Fiame ma Sui Palemia.

Pau le fa’amaoniga ua manino, o le filifiliga lea o nisi e to’atolu e avea ma fofoga (so’o-‘upu) a le HRPP e aofia ai Peseta Vaifou Tevaga, ma faipule-fou o Ala’iasa Sepulona Moananu ma ‘Afamasaga Rico Tupa’i. 

I se fa’atalanoaga ma le Samoa Observer, e le’i matua manino mai vaega ua ta’ua, ae na fa’ailoa le fiafia o le Afioga a Fiame, ona o le fa’aeaea a le vaega-fa’a’Upufai ma la latou fa’atuatuaga ua tu’uina atu ia te ia. 

“Ua fa’afiafiaina lava, ona e le gata mo lo’u itumalo a’o le tulaga fo’i o aia-tutusa o ali’i ma tama’ita’i,” o le fa’aaliga lea a Fiame.

“O se tulaga lelei tele mo matou nei ma tama’ita’i uma mo le aga’i i luma, e fa’aaogaina ai o latou tagata, o tomai ma agava’a fa’apea taleni ua iai.” 

E talitonu Fiame, e tatau i tina ma tama’ita’i ona ‘auai ma fa’amasani i tulaga tau-‘Upufai ma atina’e ‘ese’ese e maua ai avanoa e tofia ai i tofiga maualuluga fa’apea i totonu o le atunu’u. 

Na ta’ua, pau lava lea o le vaega e mafai ai ona avea ma ta’ita’i fa’a’Upufai, o le ‘auai ma galulue fa’atasi pea i le fa’atinoga o galuega nei. 

“Na amata mai lava i le taimi a’o avea ma matai talavou, sa ‘ou nofo i le nu’u i le fitu tausaga a’o le’i tamo’e i le tofi-faipule. Mai le taimi lena, na amata ai ona galue. O le avea ma sui-faipule o le palemene,  ua avea ma au galuega ma i lea taimi atoa, e maua ai lou iloa, le poto-masani ma e malamalama ai i mea uma.   

 “O le mea e ao ona manatua e so’o se faipule, e te sau na o ‘Oe i totonu o le palemene, ae  galulue felagolagoma’i ma isi na filifili mai e le atunu’u…e le faia i se manatu o se tagata se to’atasi, o le galuega fai-fa’atasi.”  

Na ta’ua fo’i, e taua lava le fa’amaoni mo so’o se tasi e naunau i tofiga pei ua tofia ai nei.

“Moni o le va’aiga lautele lava lea, fa’apea o faiga-fa’aPolokiki o se ta’aloga palapala, a ‘ou te manatu lava, a ‘ave pea le fa’amamafa a tagata i mea tonu e tatau ona ‘ave iai le fa’amuamua, o polokalame e manuia ai, e si’itia ma fa’aleleia ai le soifua lautele o le atunu’u, ae le na o mea e fa’amuamua ma mana’o iai le faipule ia.”   

Na fesiligia Fiame pe o le tofiga o le Sui-Ta’ita’i ua tofia ai nei, e mautinoa ai le avea ma Sui Palemia, ae saunoa, e iai vaega lava lavelave o le tofia.

“O le tofiga o le Sui Palemia, e tofi e le vaega fa’a’Upufai atoa,” o lana fa’aaliga lea. 

“Ae na fa’ailoa lava e le Ali’i Palemia, o le a silasila i le tulaga lena i le palota a le Vaega Fa’a’Upufai.

“’Ou te iloa o se mata’upu e tatau ona fa’amanino. Pei fo’i o le tatou ta’ita’i o le Ali’i Palemia, ‘ou te iloa o se mea amiotonu fo’i le avea o le Sui Ta’ita’i o le Vaega e fai ma Sui Palemia.

“Ae pei ona fai atu, o vaega-lavelave ia e ao lava ona fa’amanino lelei…”  

Na fa’aopoopo mai fo’i, o se mata’upu e ao ona silasila iai ma fai iai se fa’atatau pe a amata taualumaga a le  Palemene e le o toe mamao.

I le fonotaga lea i le Aso To’ona’i,  na ‘au-‘au-fa’atasi uma e fa’aauau pea ona avea Tuila’epa ma ta’ita’i. 

Talu ai le malo a’ia’i o le HRPP i Faiga Palota ua uma nei, na saunoa ai fo’i Fiame, “e ono fesiligia o tatou mafaufau pe a matou suia le matou ta’ita’i.

“’Ou te lagona e ao fo’i ona ave iai le fa’amalo ma le fa’amuamua a le Vaega Fa’a’Upufai i le Palemia ma lana ta’ita’iga. E iai lava nisi vaega e le fiafia iai nisi peita’i, o ia o le ta’ita’i na matou galulue fa’atasi i nisi o polokalame mo le matou anavatau ma mea o le a matou fa’atino.” 

Saunoa fo’i Fiame, e moni ua iai la latou fuafuaga ua fa’ata’oto, ae iai lava nai suiga i nisi o mea e talafeagai. 

Na ta’ua fo’i le to’atele o sui-faipule fou ua tula’i mai, atonu e o-mai ma nisi mafaufauga ma manatu e ‘ese mai.

“Ae le mafai lava ona se’e ‘ese mai mana’oga masani e pei o le eletise, o le suavai ma ‘auala,” o lana fa’aopoopo mai lea.

“Ae tele lava i tulaga masani pei o le tausia o tulafono ma le amiotonu, ma vaega laiti e seasea ‘ave iai le fa’amamafa a se atunu’u e le malosi tele le tamaoaiga pei o tatou.

“Ae fa’alagolago lava i vaega o le a saunoa iai sui, mea e manana’o ai.” 

O Fiame ua 58 tausaga o lona soifua, na ulua’i ulufale i le Palemene o Samoa, o le Sui-Faipule mo Lotofaga i le tausaga e 1985.

Sa tofia e avea ma Minisita o le Kapeneta mai le 1991 i le tele o matagaluega ma fa’alapotopotoga a le malo.

I le taimi mulimuli talu ai nei, sa avea ai ma Minisita o Fa’amasinoga.