Ta’aloga malolosi

By Fa’aliliu e Maiava 29 April 2016, 12:00AM

Toe mafaufau tasi lava…O le tala fai so’o lava, “O le ‘ese’esega o tama-matutua ma tamaiti, o le tau lea o a latou mea-ta’alo!” E fiafia lava nai tamaiti laiti i mea-ta’alo faigofie toe taugofie e pei o tama’i-loli, ae mulimuli ane ua avea ma tamaloloa masomasoa, ua manana’o i loli lapopo’a, ituaiga gaogaosa ma lavelave. Ae iai fo’i ma le isi mea ua fa’anaunau nisi o tatou, e manumalo ma pule sa’oloto ai: o ta’aloga malolosi.  

Tatou te naunau lava ia “sili i mea uma.” Tatou te fa’aaoga isi tagata ina ia maua tonu ai mea tatou te manana’o ai - po’o tupe, o va’aiga fa’aleTagata po’o se tulaga maualuga fo’i e iai le pule. O le mea moni, e le umi lava, ae avea aga ia ma faiga fa’apea, ma mea e masani ai o tatou olaga. 

Tatou te talanoa maulalo ma fai tala o isi uso-faigaluega, ma foliga ai, e lelei atu tatou i lo latou. 

Tatou te fa’afoliga e agamalu, e ava ma fa’aaloalo i le va’aiga lautele a tagata, peita’i, o lo tatou naunau lava lea ia aloa’ia ma amana’ia tatou ia maua ai se tulaga maualuga ma taualoa. Tatou te ola-fa’afoliga i totonu o ofisa ma fale-faigaluega, i o tatou nu’u, i ta’aloga, i a’oga ma ekalesia, e o’o lava i mafutaga fa’aleUlugali’i. 

‘Outou tamaloloa, e seāseā fa’aalia se alofa i ta’ito’alua ona e iai le manatu fa’apea, ne’i avea ai le malosi fa’aTama e fa’atonu ai ta’ito’alua, fanau ma aiga. E le manana’o e sili ane lava fafine ia ‘outou ae tumau ai pea i le le-mautonu ma masalosalo ai pea, pe tou te alolofa moni ia latou.

Ae le na o tamaloloa fo’i e faia ia aga fa’apea; e fai fo’i e fafine. Pei o le tina lea na le-mana’o e vā’ai lana fanau i mātua o ō latou mātua. O nisi fo’i tina, latou te fa’aaoga feusua’iga e fa’atonutonu ai pe fa’apele ai fo’i o latou ta’ito’alua. 

Sega e, e le fa’apena se olaga, tusa lava pe e te manumalo i na faiga ma aga e te faia. O e silafia, e leai se aoga, leai fo’i se suiga lelei o lena suafa po’o le tulaga maualuga fo’i sa e fa’ananau iai, i le isi 50 tausaga o muamua? 

Ioe, o le fiafia ma le fa’amalieina e te fa’apea ua e maua mai na uiga fa’atamaiti, e toe fo’i mai lava ise taimi ma e afaina ai. Silasila fo’i, e toe i’u mai lava ia ‘Oe au galuega sa fai – pe lelei pe leai fo’i, lea e ta’ua so’o, “o le fua lava e te lulu, e te toe selesele.’ 

Fetalai Iesu, na o le tasi lava le malosi e te maua ai se suiga o lou olaga i le taimi nei ma le taimi e te malaga ai. Pe sa avea ‘Oe o se tasi o le fanau a Le Atua pe leai fo’i. Pei ona ta’ua, “E le o MEA e te silafia, a’o TAGATA e te iloa.” 

Tatalo nei ia Iesu e fa’amagalo ‘Oe ma lou ola ai pea i ou ala sese. Tatalo ia amata suia e Ia lou tagata atoa ma lou olaga i aso ta’itasi uma. 

Na o le lua mafutaga va-va-lalata lava ma Iesu i aso uma, le malosi atoatoa e te maua ai le fiafia ma le fa’amalieina e tumau. Toe mafaufau tasi  lava...

By Fa’aliliu e Maiava 29 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>