Ua taugata tele le tau o le soifuaga i Samoa
O le manatu o le tina ia Ana Matagitau Salevaga, e 40 ona tausaga mai le afioaga o Le’auva’a, ua tele lava le suiga o le olaga i Samoa i lenei vaitau.
Na ia fa’aalia mai i le Fofoga o Samoa, ua taugata lava le soifuaga i Samoa i lenei vaitau, ma ua lelei lava lea mo i latou o mau oloa, ae atili ai ona faigata le olaga mo i latou o lima vaivai.
“Ua tele lava le suiga o Samoa i lenei vaitau,” o lana tala lea.
“O se tasi lea o suiga tele ua maitauina, o le tau lea o le soifuaga i Samoa i lenei vaitau. Ua atili ai ona faigata le olaga mo i latou e lima vaivai o
“Ua le pei o la aso ao taugofie mea uma mo tagata o le atunu’u.”
Na ta’ua e Ana, ua tele lava le misi o vaitaimi a’o taugofie oloa ma faigofie le olaga i totonu o Samoa.
“O la aso, sa maua lava le falaoa mo na’o le 10sene.
“Sa tele lava ina taugofie le tele o oloa, ma o se fesoasoani tele lava lea mo aiga uma i totonu o Samoa.
“A’o le vaitau lenei, ua taugata uma le tele o oloa, ma ua tauau ai ina faigata le olaga mo le mamalu o le atunu’u.
“Aemaise lava i a i latou o lo’o lima vaivai.
“O le vaitau foi lenei, ua tele lava ina tuliloa e tagata faleoloa o lo’o taugofie ai oloa ma maua sina fa’amama avega mo i latou.”
Na ia ta’ua foi, e to’atele lava nai aiga i totonu o Samoa o lo’o feagai pea ma lea fa’afitauli o le utitui o le fa’asoa ona o le taugata tele o le soifuaga i lenei vaitau.
“O le olaga lenei, ua tele le mau mea e fai, ae ua taugata foi le soifuaga latou ia. E fa’i o le fa’aaoogaina o le fanau, o le totogiina o pili, aemaise o mea e fai i totonu o le aiga.
“O le ala lava lea e ai ona faiatu ua taugata ma taugata le olaga, ona foi ua tele le mau mea e fai, e utiuti le fa’asoa toe fa’aopoopo atu ai ma le taugata o le soifuaga, ua atili ai.
“Ia o le matou aiga, e iai le fanau e faigaluega. E fa’atoa maua o latou totogi i le aso Faraile. A maua la totogi o nisi o le fanau i le aso Faraile, e oo ifo i le aso Sa ua uma, ae o le aso lena e mo’omia ai se tupe.
“Ia o le fa’atoaga lava o lo’o tua iai i nisi o taimi e le lava ai le fa’asoa.
“Ae pei o le talosaga lea e avatu i le malo, ina ia fa’apa’u i lalo tau o a tatou oloa, ina ia fa’afaigofie ai mo i matou o lo’o lima vaivai.”