Ola i lau miti
E tofu lava le tagata ma lana miti.
Mo le taule’ale’a ia Iesi Simeti mai le afioaga o Malie, o lona fa’anaunautaiga ina ia avea ia ma tagata faigaluega i le Ofisa o Fa’atoaga ma Faiga faiva pe a matua.
O Iesi ua 15 ona tausaga ma o lo’o aoga nei i le Kolisi o Levaula.
Na ia fa’ailoa mai i le Fofoga o Samoa, o lona fa’anaunauta’iga, o le atina’e lea o lona tomai i itu tau fa’afaito’aga ina ia le gata e mo sona lumana’i manuia, ae ia fa’apea ai foi ona fesoasoani malosi i nisi o faifa’atoaga i le lumana’i.
“Ae o le taimi lenei, o lo’o ave pea lava le fa’amuamua i le aoga.
“O lea fo’i fa’atoa uma atu suega fa’aiu o lenei tausaga, ma o le taimi lenei ua ave ai le fa’amuamua i le fesoasoani ai lea i feau i totonu o le aiga.
“O lo’o fa’aaoga lelei lava lenei taimi e fesoasoani ai i feau i totonu o le aiga.
“O le mea lava lea o lo’o fai. O le fesoasoani ai lea i feau ma vaai poo a ni tulaga e fesoasoani ai matua i lenei foi vaitau.
“Aua e toe a’e loa fo’i aoga, le maua foi lea o se taimi e fesoasoani ai i matua.”
Na ta’ua e Iesi, o lana miti lava o lo’o tulimati i le taimi lenei, o le avea lea o ia ma tagata faigaluega i totonu o le Ofisa o Fa’atoaga.
“Mai lava i le laititi, e pei lava o le fa’atoaga e tua i ai le to’atele o aiga aua foi ni seleni.
“O le ala foi lea ou te fiafia ai lava a’u ia i le atina’e lea o le galueaina o fa’atoaga ma fanua aua foi meaai ma su’e ai seleni a aiga.
“O le tele fo’i la o tomai na ou iloa mai i mea tau faifa’atoaga na ou maua mai lo’u tama.
“O le ala foi lea ou te naunau ai ina ia avea a’u ma tagata faifa’atoaga i le Ofisa Faifa’atoaga i Samoa, ina ia maua ai se avanoa e fesoasoani atu ai isi faifa’atoaga i totonu o Samoa.
“Ia te a’u lava ia la i le taimi nei, o le toaga lava i meaaoga ma fesoasoani if eau a le aiga.
“E taua lava le galue malosi i so’o se tiute ma so’o se mea e faia i le olaga nei. Aua o le upu lava lea a lo’u tama ia te au.
“A le galue le tagata e le maua se mea lelei.”