Mativa Samoa i avanoa

By Vatapuia Maiava 06 November 2016, 12:00AM

O le manatu o le tinā ia Harieta Gafa e 26 tausaga mai le afioaga o Faleula, ua telē lava le suiga o le soifuaga i Samoa nei. 

Na ia ta’ua ua tele suiga i Samoa ona ua tele ina taumafai le malo ina ia fa’atutusa le olaga i Samoa nei ma atunu’u mamao. 

“Ua faigata le olaga i Samoa i nei vaitau,” o lana fa’aaliga lea i le Fofoga o Samoa. 

“Ua faigata ona maua ni galuega, ua taugata le soifuaga ma ua tele le mau fa’afitauli ua feagai ai ma tagata Samoa.

“Out e talitonu a’u ia ua mafua ona faigata ona ua taumafai le tatou malo ina ia fa’atusatusa le olaga o Samoa i isi atunu’u e pei o Niu Sila ma Ausetalia. 

 “Ae ou te talitonu au ia e le tatau lava ona tatou ola fa’ata’ita’i fua i isi atunu’u. 

“A taga’i nei i isi atunu’u, o lo’o anoanoa’i avanoa e mafai ai ona maua e tagata mea e saili ai manuia mo fanau ma aiga.”

E le gata i lea, na ia ta’ua foi, o le tulaga aupito sili ona faigata, o le faigata o le olaga o le’a ola ai nei fanau ma le lumana’i o a taeao. 

“O Samoa o se atunu’u to’afilemu ma faigofie le olaga o tagata. Ou te manatu lava au ia e tatau lava ona ave le fa’amuamua a le malo ina ia atina’e nai aiga o lo’o taumafai ma mo’omia le fesoasoani. 

“O le a le aoga o atina’e tetele ma le taumafai ia tutusa ma isi atunu’u ae o lo’o to’atele i latou o lo’o oi ma fia maua se fesoasoani? 

 “To’atele nai aiga o lo’o iai fanau e le’o mafai ona ave i le aoga ona o le lē lava o le fa’asoa. E maua le avanoa aooga fua ai fanau, ae peita’i e o’o loa i le Iunivesite, ona faigata loa lea ona maua ni avanoa o tamaiti e aooga ai ona o le taugata.”

O lona manatu, o le mativa i avanoa o lo’o maua i Samoa. 

“E tatau i le malo ona taula’i la latou va’ai ina ia fa’aleleia aiga ma le olaga o tagata Samoa ae aua le taumafai fua ina ia fa’atusatusa le olaga i Samoa i isi atunu’u mamao. 

“E mo’omia le ave o avanoa i tatou tagata, ina ia saili ai ni manuia ma aoga a fanau. 

“I lo’u lava manatu, ua fai lava si taugata o le soifuaga aemaise le tulaga i tau o oloa ua iai nei Samoa. O le mafuaaga lea ua to’atele ai tagata ua oi ma faitio. 

“E fa’alogoina pea foi le fa’aupuga lea o fanau o le tofi ma le lumana’i o a taeao, ae afai o le tulaga lea o lo’o iai le olaga, e ola falolo nai a tatou fanau i le lumana’i.” Na ia fa’aalia foi, ua tatau i le malo ona Iloilo lelei po’o le a se tulaga e tatau ona faia ina ia fo’ia ai lenei fa’afitauli manu e le’i tele sona aafiaga. 

“Ua mo’omia lava ni suiga fou i totonu o Samoa. Ou te manao i se Samoa e ola fiafia ai tagata ma ola lelei ai a tatou fanau. 

“A lelei ma faigofie le olaga, e fa’apena foi ona fa’atumauina le mitamita o tagata Samoa e ta’ua i latou o Samoa.

“O la’u tu’ualalo lena i le malo. Ina ia taga’i lelei i le tau o le soifuaga ua iai nei ma fai se tulaga ina ia manuia ai fanau. 

“E pei ona fai atu, e le’o toe tutusa lava aso nei. Ae a lelei lava ona fo’ia le fa’afitauli, e mafai lava ona toe suia le oi ua iai nei ile ola fiafia ma le ola manuia.”

By Vatapuia Maiava 06 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>