E omai fa’atasi suiga ma faigatā

By Fetalai Tuilulu’u 06 March 2017, 12:00AM

O lea le talitonuga o Tafea Amoni o Vaitele i le fa’atalatalanoaga ma le Fofoga o Samoa i le fa’ai’uga o le vaiaso na se’i mavae atu nei.

“Ia ua tatou tau fai molimauina uma lava le tulaga e pei ona ua i ai nei si o tatou atunu’u ma ua le toe faigofie lava nei aso ona o suiga aemaise o le taugatā o le tau o le soifuaga o lo’o ua tatou i ai nei.

 “O le itu mautinoa lava, ua le’o toe faigofie nei aso ua tatou i ai ona o le tele o suiga ua ofi mai totonu o si o tatou atunu’u.

 “Ia a fa’aopopo atu ai loa la ma le mana’omia ai o tupe i taimi uma mo aiga, aemaise o le atina’eina, ona tatou tau fai molimauina loa lea o le faigata tele.

O le isi itu na fa’ailoa e Tafea ua fai ma popolega i le taimi lenei o le taugatā o le tau o le soifuaga o lo’o ua i ai nei.

 “Ia e pei o lea lava le tulaga e le tau fesiligia i le taimi lenei, e talanoa mai lava o tupe i taimi uma ae o le matua’i leai se oloa o toe taugofie mai sona tau.

 “Ua le’o toe faigofie nei aso, ma ua tele lava suiga e pei ona ou fa’ailoa muamua atu ua i ai nei.

O Tafea o ia o se tamā e to’atolu ona alo ma o lo’o galue o ia i le Malae Tapolo i Faleata.

Na ia fa’ailoa o le lotu ma nisi o mea fai o le nu’u o nisi nei o vaega taugata o le  soifuaga o lo’o ua i ai nei.

 “Ia e pei o lea lava le tulaga i le taimi lenei , e pei e o’o mai loa le mau fa’alavelave ia ona taumafai loa lea e su’e oti ia tupe ae le gata i lena , o lae fai isi mau fa’alavelave ae o le mafaufau lae alu pe fa’afefea ona totogi le pili o le paipa ma le eletise.

“O le tele ia o vaega e ao ona fa’ataunu’uina i aso uma.

E ui lava la i le tele o suiga ma vaega o lo’o molimauina i lenei vaitau ae na fa’ailoa e Tafea, o lo’o ave lana fa’amuamua i lana fanau.

 “E ui lava i le faigata ae pei o lo’o ave lava la’u ia va’ai i la’u fanau, ina ia ola lelei.

 “Aua e pei ona ou ta’ua muamua, ua ese la aso ma nei aso, ua taugata mea uma lava.

 “Ua fa’apea ona taugofie mea uma ma faigofie la aso, ia o le taimi lava o le una’ia lava o fanau i le aoga, a matutua ane ia ua mautinoa fo’i.

By Fetalai Tuilulu’u 06 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>