O Elisapeta Lafaele o se tinā e 41 tausaga mai le afio’aga o Falefā. 

O lona finagalo e le’o i ai se mativa i Samoa. E lē gata i lenā, ae na ia fa’ailoa mai i le Fofoga o Samoa lona lē auai ai i manatu o nisi ole atunu’u ua fa’apea o mea fa’alelotu ua mafua ai le ola mativa o Samoa.

Aisea? O lona finagalo, “Ou te le lagolagoina manatu o nisi ole atunu’u i le tulaga lea.

“O lo’o fa’apea mai le Tusi Paia, ia outou foa’i atu pea, ona foa’i mai lea o tagata iā te outou. O lona uiga,o le taui e maua mai e fa’alagolago i le mea e te avatu.

“E ese’ese lava ala o fa’amanuiaga a le Atua mo i tatou, ma afai tatou te auauna ma tautua ma le loto atoatoa, o le’a ia fa’amanuia mai fo’i ia te oe ma lou aiga.

“ A le maua fo’i nei, e i ai lava le taimi e o’o mai ai ana fa’amanuiga mo oe. “E leai se mea e leaga ai le faitio a tagata, auā e mau ese’ese lava tagata.

Ae iā te a’u lava ia, ou te lagolagoina le manatu lea.  “Ou te le manatu fo’i e iai se ola mativa i Samoa. “Tatou te galulue uma lava mo manuia o aiga. O lou lumana’i fo’i o lo’o i ou lava a’ao. 

“Lona uiga, a lē galue le tagata, ona tupu loa lea o le oi. “E le’i fa’apea fo’i ua iai se isi ua oti i se fiaai i Samoa. 

“O lo’o i ai o tatou ele’ele ma le sami e fa’alagolago iai. “E faigofie lava. “A leai sau galuega, e mafai lava ona fai sau ma’umaga ma e alu e fagota.

“E tele fo’i ma anoanoa’i a tatou taleni ese’ese mai le Atua e mafai ona fa’aaogaina e tausi ai aiga.” E ui i lea, na ia fa’ailoa mai o lo’o ia matuā fiafia lava i le olaga i nu’u i tua.  “O le olaga i tua nei e vala lava ma le olaga i Apia.

“E maua lava mea uma e mana’o ai i tua nei. “E tusa lava pe leai sau galuega, e mafai lava ona maua mai mea e tausi ai aiga mai le lau’ele’ele.

“E lē pei o Apia e tatau lava ona iai se galuega auā le tausiaina o aiga. “O le olaga i tua nei e faigofie lava ma filemu.”