O AI NA TE FIA MANATUA LE AGALEAGA?

05 June 2016, 12:00AM

O lea ua faasolo le vae o le uati i le ‘afa lona lua o le 2016-ma e ui lava ina faapena se vaaiga faale-mafaufau-ae o le mea moni-o loo toso faatasi atu ai ma mafaufauga ootia o le atunuu-ona ua siliga se lavea’i i ona puapuaga-ma o ia la puapuaga- o le taugata o le tau o le soifuaga-talu ai le lafoga o le VAGST na fai e le faiga-malo o loo i ai nei-o le tele o lafoga e totogi e le atunuu-aemaise ai o le faamalumalu mai o le aitalafu i fafo a le Malo-lea ua sili atu i le $1.7 piliona.

O lona uiga la- e te’a le minute-te’a le itula ma le aso-ae le mavae le loto mafatia ma le popole –pe a manatu i le tele o taimi -e faailoa atu ai i ta’ita’i o le atunuu-“ua pologa le atunuu ma ua mapuitiga.”

Ua lasi foi taumafaiga sa lagā e ala i le tu’u-a-lalo-ae tasi pe lava lona ‘auga-ia tu’u atu ma faailoa atu-“ua matua mafatia le atunuu ma ona tagata.” O lea la ua aga’i le 2016 i lona nofoaga-ma ua faasolo foi i le 50 tausaga –talu ona pulea e le HRPP le Malo o Samoa- e le toe foi mai lena taimi-ae pau o le mea—o le a nonofo pea ma Samoa ‘manu’anu’a’ ma ma’ila’ila’ o le fiu e taufonō ma tau-alaga-‘ta fiaola’!

O ai la e fai ma molimau o nei mea uma? E lē molimau ni fuainumera-e le molimau ni Tala o le Tupe-e lē molimau foi se faa-itu’au poo se Vaega Faa-Upufai-e le molimau se tau-faaleaga poo le agatele mai, ae sili ai ona faigata-pe a avea ma molimau ni ‘folafolaga’.

Aisea? Aua foi afai ou te fai atu nei e salafalafa le lalolagi-e le avea lena ma ala e salafalafa ai fua le lalolagi. Pe ou te fai atu fo’i e lapotopoto-e le avea lena ma ala e lapotopoto ai fua le lalolagi na fai ia salafalafa!

O le uiga o lo’u taofi-e le mafai ona avea le faapea mai o le Malo o loo manuia tagata -ma ala tatou te ioe ai- o loo faapena, e le mafai fo’i  ona fai mai fuainumera- o loo solo lelei mea uma-ona tatou faapea ai lea -e moni; e le mafai foi ona faapea mai le Tala o Tupe o loo manuia le atunuu-ona tatou alalaga ai lea “Alleluia”.

Leai-o loo molimau le vaai tino ma le tago i ai. E le tau sailia foi se molimau o le mativa masaesae o loo fealua’i solo i Apia- ma femaulu solo i totonu o kalone lapisi. E le tau sailia foi se mau o le lima tagovale -aua e mafai ona su’e i le molimau a le Faamasinoga i lea aso ma lea aso.

E le tau sailia foi se molimau o le faatautala ma le le popoi i mea faitele a le atunuu-aua o lea ua tele meatotino a le atunuu ua uma ona faatau atu.O pine ia ma molimau ola- e faamaonia ai mea ua tututupu -ma ou te faapea atu-o mau nei -e tutῡ faafeagai ma le amiotonu a le lalolagi atoa.

O lea ua agai i le faaiuga o le 2016 ae ua matua tele mea ua tutupu i totonu o si o tatou atunuu itiiti ma le faatauvaa. E anoano foi mea ua tutupu ma mea ua faatino-ae o le faaupuga lava e faalele so’o mai-o ‘manuia o le atunuu!

O le fesili-afai la o i ai ni manuia-‘o fea la o iai?”Se alofa i le atunuu- le tiga lava ona fai atu e tu’u le VAGST ua taugata ai le soifuaga -ae fai lava? O mea na-atoa ma le tele o isi mea- o loo faaseā ai le atunuu-e le mafai ona galo!

O le pogai lea ua ‘ou fai atu ai-‘e alu alu muta taimi faatulagaina o le 2016, ae o le pologa o le atunuu-e le galo-aua e le uma pe afai o le ituaiga lea o faigamalo- e filifilia pea e le atunuu i le lumana’i. E fa’i o le oi o le atunuu i le mativa ma le le tagolima-ae o le pologa o le mafaufau i le fiapule o ta’ita’i.

O le fesili la ua tula’i mai -pe o le mea ‘ea -na fai le Malo o Samoa-ina ia manuia ai na o se tagata, na o ni tagata, na o se vaega faa-upufai- pe na o se itumalo? Pe na fai mo le manuia o le atunuu atoa? I le taimi nei ma lo’u lava iloa-e le o manuia le atunuu poo tagata o le atunuu- pe o i ai foi se iota o se manuia!

E le tioa ona siliga tali-i-seu se lavea’i mo Samoa; e le tioa ona mapuitiga le atunuu! Ua matua afu sisina le atunuu-talu ai faiga a le faigamalo! Ae ui o lea Samoa-o loo soifua le Atua o loo faavae ai Samoa. Ma o le talitonuga maumaututu-o le taimi lava e finagalo ai le Atua e fai se suiga-e le mafai e se tasi poo ni ta’ita’i poo se vaega faa-upufai ona taofi! Ia manuia tele le Aso Sa Samoa ma ia faamanuia atu le Atua!

05 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>