Mo’omo’oga o matua mo le lelei o fanau

By Seia Soloi 05 April 2017, 12:00AM

I le aluga ai o le soifuaga i aso uma, e tofu lava le tagata ma lona aoga ma lona sao aua le atina’eina o aiga ma fanau mo le lumanai. Ma o le tulaga faigata o nei aso, ua le toe toatele ni tagata faigaluega i totonu lava ia o Samoa i le taimi nei.

Mo le tina ia Sevai Lafoga ma lona aiga e toatasi lana tama e faigaluega ma ua na’o le pau lea o le alagatupe o lo’o faamoemoe ai o ia mo le tausiga o lona aiga.

“O leisi o le fanau e aoga i le Iunivesite ma o le tulaga lava ia i lona pili aoga e ese le taugata ma ua na’o la’u tama lea o lo’o faigaluega pau lea o le tagata o lo’o faamoemoe iai” o lana tala lea i le Fofoga o Samoa.

O mafatiaga o lo’o feagai ma le tina o le lava lea o le seleni maua aua le tausiga o lana fanau aoga.

“Soo se matua lava e naunau lava ina maua mea uma aua le ola ai o fanau i taimi uma aua o seleni maua mai a la’u tama-tama o lo’o faigaluega e le gafatia pe lava ai se matou faasoa aua o pili aoga a le fanau e le’o ni mea taugofie.“Ae le gata i lea o se fesoasoani mo se fausiaina o se matou fale fou aua pei ona silasila atu e le’o lelei ma mautu lava se tulaga i se fale lelei, ma o la’u faamuamua lena.

I le mafaufau a le tina o lo’o fia saili sana galuega aua sina fesoasoani ai mo lona aiga aemaise lana fanau aepeitai o lona naunautaiga ina ia nofo i le aiga e sili lea mo ia.

“A o lava le fanau i le aoga ae pei o a’u lava e faamuli i le fale ma o lo’u manao foi tusa lava po o le a le mativa ma le le tagolima ae o le taumafai lava ina maua e fanau le ola manuia mo nei ma le lumanai.

O lana mau, e moni ua taugata le soifuaga ma lenei vaitau ua tatou iai ae e le mafai ona ‘aloese mai ai.

“E faitio lava tagata i aso uma i le taugata o le soifuaga aepeitai e leai se tatou mea e mafai ona fai aua o le aluga lava lea o le soifuaga e alu lava i luma ua faapena ai foi ma le tau o le soifuaga. Ma e tusa lava po o le a le taugata e faia lava aua o mea ua masani ai o taou tagata mai aso anamua.

Pau le naunautaiga o le tina, o le faamuamua lea o manaoga a lana fanau ma fanau a lana fanau ma o lona manatu ua ia le sailiia ai lava sana galuega ona o le vaai alofa i le tausiga o le ola o fanau i aso uma.

“E faamuamua lava fanau aua o le iute lava lea faa-matua i fanau a lelei le tausiga o fanau e le tauilo le taunuu i se taunuuga lelei toe mautu.

By Seia Soloi 05 April 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>