O le olaga o le Samoa e Tautua – Malia Savea
“E ala ona matitiva tagata Samoa o le lē galulue ae ua fa’alagolago i tagata i fafo.” o le finagalo lea o le tinā i a Malia Savea, 63 tausaga o Falevao.
Na ia fa’ailoa i le Fofoga o Samoa i le aso ananafi e sili ona to’afilemu ma filemu le olaga i afio’aga i tua pe a fa’atusatusa i Apia i le taimi lenei.
“Fa’afetai tele lava mo le fesili, o lona ese’esega o i matou i tua nei ma Apia, o tua nei , e ese ma le to’afilemu, e filemu mea uma.” o lana tala mai lea.
“O le isi tulaga e matou te fa’alagolago lava i tupe mai o matou lima e ala i mea toto, fa’ato’aga, fuala’au ‘aina, ia o mea na lea e mafai ona tausi ai aiga aemaise le Ekalesia.
“O tua lava iinei, e ese le to’afilemu; e filemu mea uma.
“E leai ni vevesiaiga, e filemu lava.
Na ia fa’ailoa i le Fofoga o Samoa e ala ona matitiva tagata Samoa o le ola fa’alagolago.
“E sa’o o Samoa e mativa, ma e faalagolago Samoa ma aiga ta’itasi i tagata faigaluega, ma e le taitai lava le faasoa.
“O matou e tasi le tagata faigaluega, e i ai tagata e lafo mai ai tupe mai atun’u mamao, e le lava le faasoa i le tagata faigaluega e to’atasi, aua e fai o mea faalenu’u , mea faalelotu , e pei e tele na fa’aalu ai seleni tagata Samoa.
“O so’o se nu’u lava e i ai lona lave na i mea fai o le lotu ma mea fa’alenu’u, ma ua fai mai ai ua tele mea fai le nu’u ma mea faalelotu.
“Ae o a’u lava ia, e mafai lava e le Samoa ona fai, o le olaga o le Samoa o le tautua , o le olaga o le Samoa o le fai mea fai, i aso uma aso uma e ala ona matitiva o lo tatou nofonofo ae le galulue e sa’o e taugata , ae o le le galulue lava.
“E ala la na mativa tagata Samoa o le le galulue, ua faalagolago i tagata i fafo ae ua le o tatou e galulue ,
“E le pei o fafo a le galue e le maua se seleni; e tele mea totogi, ae o tatou o lo’o ola fua lava i Samoa nei.