Toe iloilo e le Loia Sili a le Malo le faaogaina o la’au malosi

By Lanuola Tusani Tupufia 04 May 2016, 12:00AM

Ua la’a atu i totonu le Ofisa o le Loia Sili a le Malo e faatino ni fautuaga mai le Ofisa o le Komesina o Sulufaiga e uiga i le faamatalaina ia manino le taualumaga tau le faaaogaina o la’au malosi e alii Leoleo.  Na fai e le Komesina o Sulufaiga o Maiava Iulai Toma ni fautuaga ina ua mavase se suesuega i le pu’eina ma la saisaia-i se faiga solitulafono ma le faasaua o Suitupe Misa i le maketi i Fugalei.

Na fautuaina e Maiava le toe iloiloina o le fuaiupu 13 o le Tulafono o Leoleo ma Pule e le Matagaluega o Leoleo i se faiga e feutaga’i ai ma le Ofisa o le Loia Sili a le Malo. 

O lona uiga ia faamatala mai se taualumaga malamalama ma tapula’a mo le tuuina atu o pule faataga mo le faaaogaina o la’au malosi , ma le aofia ai o se aiaiga ma ni ta’iala mo le faaaogaina o laau malosi i tulaga faanatinati e aunoa ma le mua’i faamaonia e se Minisita. 

Na faamaonia e le Loia Sili fou a le Malo o Lemalu Herman Retzlaff e faapea o loo faatinoina e lona Ofisa se toe iloiloina faatasi ai ma le Komesina o Leoleo, o Fuiavailili Egon Keil.

 “O lea ua amata ona matou tilotilo i le fuaiupu (13 o le Tulafono o Leoleo ma ana Pule,” o le tali mai lea a Lemalu i se imeli i le Samoa Observer. 

Ma ua uma ona matou vala’aulia le Komesina o Leoleo ina ia matou galulue faatasi e tilotilo i le faamalamalamaina ma le faamautuina o tulafono laiti ma tulafono ma le faaaogaina o la’au malosi. Ua uma ona ‘ou faailoa i se tasi itu e faapea o lea o loo sailia i le taimi nei e leoleo ni tusi saisasi mai le Faamasinoga mo soo se faaaogaina o la’au malosi.” 

Fai mai Lemalu o lona taofi e faapea o “soo se tulafono lava ma tulafono faatonutonu e faasino i le faaaogaina o la’au malosi e leoleo e tatau ona tauaveina ai le paleni i le va o le puipuiga o aia tagata o tatou tagatanuu ma le mafai e alii leoleo o loo galulue ma le tautiga –ona puipuia i latou i le taimi e faatinoina ai o latou tiute.” Na ia toe ta’ua e faapea e le’i fatonuina lona Ofisa e faafeagai ma soo se isi lava vaega o le lipoti. 

I lalo o le Tulafono o Leoleo ma Pule 2007 fuaiupu 13(2) o le a le tatau i le Komesina ona ia faatagaina se alii leoleo na te umia se la’au malosi, ututau, mea faapāpā malolosi poo auupega mata’utia mo le faaaogaina i le faatinoina o tiute o lea alii ofisa.  

O loo faaalia foi i totonu o le fuaiupu 13 (2)(a) e faapea e tatau ona faamaonia e le Minisita le faa-auupegaina o alii leoleo poo se tagata. Sa faaalia foi e Loia mo Suitupe Misa, Sarona Ponifasio-o loo la toe iloiloina foi le lipoti a le Komesina o Sulufaiga. Fai mai Mrs. Ponifasio e le’i o’o i le taimi e faaali ai sona manatu ae o le a fai se faaiuga pe a mae’a le toe iloiloga. 

.Ua uma ona tuuina atu e le Komesina o Leoleo, o Fuiavailili Egon Keil se faamatalaga o loo faaalia ai e faapea na te faaaloalogia ma aloa’ia tulafono a Samoa ma o se mataupu lavelave lea e tusa ai ma aia tatau faale-Faavae a tagata uma. O le a faaauau pea ona fai e Leoleo a Samoa soo se mea e tatau ona fai i totonu o le tulafono e tausi ai le saogalemu o lo tatou atunuu ma o tatou tagata,” o lana faaaliga lea. Ua uma ona fai le tonu e le Ofisa o le Komesina o Sulufaiga e faapea o lea suesuega ua maua ai se vaega tele o mea mata’utia-ia e moomia ona tuliloaina e se gaoioiga. 

“O le itu e aupito i sili ona mata’utia- e aafia ai faamatalaga na maua i sailiga e faapea o le pu’eina o Suitupe sa sese ona fai ma e le tusa ai ma le tulafono,” o le faaaliga lea a Maiava i totonu o le lipoti.”

“O le faaaogaina o la’au malosi sa le faatagaina ma o loo atagia ai se tulaga popole o i lalo o le Komesina fou i se faiga a le Iunaite Setete tau leoleo lea ua faaalia ai se tulaga faigata i le saogalemu o tagata lautele ma le malu puipuia.

O faiga a le Komesina ua tula’i mai ai le mana’omia o ni mea se tetele e ao ona fai, e tusa ai ma faiga a nisi o alii ofisa i le faagasologa o le pu’eina ma lo latou auai mulimuli ane ai i totonu o lenei suesuega.”

By Lanuola Tusani Tupufia 04 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>