O LE TALA I LE TAFEA O LE UTU A TAUFAU

04 May 2016, 12:00AM

Na gasegase Taufau-ona fai atu lea ia potopoto mai lona aiga ma faleupolu-alu se fe’au i la’u tama o Tupuivao o loo seu-lupe , ia vave mai nei lava ma te feiloa’i-ua ‘ou vaivai!. Ona alu ai lea o le fe’au i lana tama sa ta’a-seu i gauta o Falealili ma Safata.

Ona fai mai lea o Tupuivao: Ou te le alu atu- e le taua le ma’i o Taufau i lo lo’u mana’o e fia seu. Ona sau lea o le taule’ale’a ta’u i le Tamaita’i-e le sau Tupuivao. Ona toe faapea atu lea o Taufau-toe alu se isi i si a’u tama e sau vave- ina ne’i o ma le feiloa’i-nei faapea o ia o sina ma’i faatauvaa lea ou te ma’i ai.

Ona toe alu foi lea o le tili o le gasegase o Taufau-ma fai atu ia Tupuivao –‘Na ‘ou sau-ua vaivai le ma’i o lou tina o Taufau-fai mai ta te o atu. Tali Tupuivao-‘Alu ia oe ae se’i o’u talia Lupe o Pupula. Ona toe alu foi lea o le tama-ma fai atu ia Taufau-‘e le o sau Tupuivao.’

Ona toe fai atu foi lea o Taufau-Alu se tili ia Tupuivao e sau! Ona toe alu foi lea o le tili ma fai atu ia Tupuivao-“Sau ia ta o ua vaivai le gasegase o le Tupu. Tali Tupuivao-“Ou te le alu atu-se’i o’u talia Lupe o Mauna.

Ona toe alu foi lea o le Tili ma fai atu ia Taufau-‘Ua le sau-fai mai se’i nofo-se’i ona talia Lupe o Mauna. Ona fai atu lea o Taufau le Tupu-“Ia Potopoto maia lo tatou Aiga ma Tumua-ma ia faafofoga lelei mai i la’u upu o le a pa’ū atu:-

“O le a tafea la’u utu” –“ae āu le utu a si o’u uso o Sina”. “A’o oe-Faumuina-ia ‘aua ne’i e fefe pe a sau le tamaloa faafia saua, aua e “au Aiga ia te Oe- e ‘au foi i ai Faleupolu. A fingalo Tumua e te Tupu- e te Tupu lava-a’o a’u nei-

“ua tafea la’u utu.” O Tupuivao lenei sa fai ona aso i tagata i Samoa uma. Sa fai lana ‘afa ma tatau i le va o Tufu ma Satupaitea. A lavea lena ‘afa i se malaga-ona fasioti uma lea o lea ‘aumalaga; ae a le lavea i lena ‘afa-ona sao lea o le malaga.

Na molia Tupuivao i le motu, ona o lona saua. Ona o ai lea o Salemuliaga ua aami Tupuivao. Ae o le tali a Tupuivao e faapenei-“Fati paopao le galu i Fagatogo-le La’i su’ena Olosanamea-o Lupe na o Mauga o Feta’i-E lia’i i tua o Mataumē ma Apimaliē-Lou ala lea i manū ma le ola-Le pale o Sina ma Logonaanafi-Ua igo ua igo lava le Saifiliasa-E pipili Tia ae mamao ala i le finagalo o Salemuliaga; ou te le toe a’e atu lava-O le a ma feao ma le fanua Lefa’a’auua.

O le saua o Tupuivao sa fai ma muagagana i Samoa. O ia o se tasi o tagata saua o Samoa anamua. A faalogo tagata i lona saua ona fai mai lea-“O Tupuivao lena sa fai ona aso i tagata i Samoa uma. Sa fai lana ‘afa i le va o Tufu ma Satupa’itea.

A lavea lena ‘afa i se malaga-ona fasioti uma lea; ae a le lavea lana ‘afa-ona sao lea o le malaga.Ae poo le a lava le saua o Tupuivao-ae na to’ilalo lava ia Faumuina-ona faatafea ai lea o ia i Tutuila e pei o Vaafusuaga ma isi-ma o ia tala uma o loo manino lelei i totonu o se pese.

O le muagagana faa-Samoa e faasino ia Tupuivao e faapea-“E talanoa a ua to i tua Apolima”-o lona uiga-ua ola le malaga-ua le fasiotia e le alii fai-aso. O Tupuivao foi lenei na la’u lona fanua tele i Samoa e nofo ai-ma sa la’u mai i pogai-isu o tagata uma- e sa ona tago i ai lima. 

Na ala la ona le manatu mamafa Tupuivao i le gasegase o lona tina o le Tupu o Taufau-ona o lona mana’o lava- ia tau ni ona taua-ae peitai-na faato’ilalo lava e Faumuina e pei ona mavaeaina-ma faatafea ai i Tutuila.

04 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>