LAUGA - “Ia fai oe ma faaola”

Tusia Rev. Petaia Setu ,

79 Hits

Rev. Petaia Setu

Rev. Petaia Setu

Sa ta’uta’ua ai Nafanua i tala faavae o Samoa  anamua. Na tuumalo ai Tamasese i lana finau ia ola Samoa i se tautua a le Mau.

Sa anapopogi ai foi le galuteine a Eseta ma Sa Iuta uma ina o sosofa e le masiofo le tulafono o le maota o le tupu (Ese.4:16). O nisi nei o toa ma suafa iloga sa auauna ma tautua mo le manuia saoloto ma le ola fiafia o Samoa ma le nuu o le Atua.

E a, e le ono ofi atu  ai ma oe i le lisi lea? O tagata e tetelelē loto! E loto uso;  e loto aiga; e loto nuu; e agaga i lona atunuu. E le su’esu’e masei, ae loto i mea lelei. Na te le manatua le leaga, ae na te faasili le alofa i tagata.

O Iosefa, na mua i le lisi lea. Fai mai le tautinoga alofa a le palemia o Aikupito i ona uso, “Na auina mai foi a’u e le Atua e muamua ia te outou e faasaoina outou i le lalolagi, e faaola foi ia te outou i le faaolataga tele.”

Ua  le tasi se mea ua fai e le aualii matutua ia ia Ioefa. E lili i le tama lea auā e auau iai lo latou tamā. E le fia faalogo i ni manatu o le tama lea (Ken.37:8) E tautalaititi! E faafiapoto! E fouvale!

O leo ia ua faagaganaina ai e le alii o lenei lalolagi le le malamalama i fuafuaga a le Atua i lana faaolataga. E feū taliga i le mea moni. O le ala foi lea e teena ai le Upu Moni. A ‘ua faaalia e le Atua ia mea i tama valevale (Mata.11:25).

Ioe, e faailo e le asō taeao. (Ken.37:7-9). O le asō, e tapenaina taeao. O fuafuaga manino ia a le Atua; a ua le maua e le au matutua. O le faaiuga, fasioti! Lafo i le lua! Faatau atu i le au faatau ‘oa (Ken.37:24-28). E faapea lava uiga faigata o lenei olaga. E le fia toilalo. E fau faaletagata o tatou olaga. E ’ai filifili a tatou faai’uga faaletagata.

Ua faasa Iesu i o tatou olaga. Ua tatou faailoga tagata, ma faavasega tulaga. Ua iloilo agavaa, ma su’e fano tupu’aga. Manatua foi e laitiiti Iosefa i faletama uma nei! Ia vaai la ia te oe! O ‘e taulamua i ni taupulega leaga? E le o ou manatu ea ma lou leo o loo faatautee i le Mau o le faaolataga? Uso e, ia fai oe ma faaola. Poo le a lava le ituaiga galuega, ia e silafia, o le finagalo moni lea o Iesau Keriso ia te oe- ia fai oe ma faaola.

Ia ola se agaga ia te oe. Ia saoloto se tapenaga ia te oe. Ia tupu se faamoemoe mautinoa o le Atua i lou leo. Ia tu le malo o Keriso i lou loto. Ia iai sou sao i fuafuaga mamana a le Atua i lana faaolataga.

Manatu lava isi faletama ua motu Iosefa ma le gafa! Fā’i lava a le au uso matutua, o la lea le mutaaga! Sole, o le a’a tu lea o le faaolataga. Pe laitiiti lava le tama lea, ae itiiti a legamea.

Ua le mafai e Iosefa ona oono le moni – ia fai oe ma faaola. E aumā le tofi palemia? E malosi lava le loto, e le o se Aikupito, a o le suli o Iakopo. E le o Sapenapaenea! :O a’u o Iosefa.” Talofa, o le igoa ua leva ona leiloa! A lea ua gafoa! Auā e tu pea le Atua i manimoa. Ua tini niti. O le taeao lea sa valo’ia i Kanana. La lea ua fai le alii fai miti ma faaolataga.

O le uiga o le igoa, Iosefa, ia faaopoopo e Ieova. E faaopoopo le a? Samoa, e le i toe autaluina e Iosefa le tuana’i. Na te le i tauleagaina foi le sesē o ona uso. (F.5) Na ia iloa mamao atu le silisili ese o le alofa o le Atua o ona tamā, ma fuafuaga mamana a le na ia faia mea uma lava, e ala i tapenaga o le faaolataga ma le amana’ia o lona tagata.

E le o le ’oa poo le tamaoaiga. E le o le pule poo le malosi. E le o mamalu foi poo le tofi. E le o le poto poo faailoga – a o le alofa. O le autu lea o le galuega faaola. Ia faaopoopo ia te oe e Ieova le alofa e malu iai le vaivai. E mapu iai tiga. E ma’ona ai le mativa. Le alofa e tali i le matelaina. E fai ma sulufa’iga.

’Aua ne’i faapito manū ia Tasi. ’Aua foi le fuapauina le alofa ia te oe lava. E le i manatu Iosefa o ia ua fai ma ta’ita’i; ua pule i le nuu uma lava o Aikupito. Na ia iloa o ia o le auauna a Ieova. E malamalama i lona faaeaina.

O faiga a le Atua! Na fai ma taitai ina ia fai ma lavea’i. Na fai ma pule ina ia fai ma faaola. Ae a tatou? O faapea ona fai lau tautua i le Atua? O ’e iloa ea ona alofa, poo lou vaisū lava le faamo’amo’a?

O fai oe ma faaola, poo fai pea oe ma amoga? Ua e misi alofa i le pologa, ae gugū i se faasa’oga! Tatou te fealofani i upu ma lafoga, ae valavala i le faatinoga! Fai mai Iosefa, Na auina mai a’u e le Atua i Aikupito; i le tofi; i le nofoa; i mamalu; i le faaeaina, e faasaoina outou. Ia faasaoina outou. Na fai a’u e le Atua ma palemia; ma taitai; ma pule; ma alii sili, ina ia faaolaina outou. Matuā lelei se lenei tama na te iloa lana galuega. Na te lagona lona valaauina. E le usitai i lona loto ae faalogo i le Atua. 

Uso e, e te iloa o loo nainai oe e le Atua? O ’e iloa o loo amana’ia oe e le Alii? O oe le isi o loo mana’o ai le Atua e fai ma ala o lana faaolataga peitai, o loo taataaloa lava lou mafaufau.

O loo pogisa pea lou lalolagi e te le o amana’ia lou amana’ia e le Atua. Se a sou sao? O ’e iloa le faaolataga tele o loo tautala iai Iosefa? E le na o le fanau a Iakopo, a o le lalolagi atoa. E le na o le aveeseina mai o Isaraelu mai Aikupito; a o le aveeseina o i tatou uma mai o tatou olaga leaga ma faiga piopio. E le na o le taitaiina atu o le nuu i eleele o loo tafe ai le suasusu ma le meli; a o le taitaiina atu o oe ma lou aiga i le Parataiso o taumasuasua ai manuia o le ola e faavavau.

Le au uso e, e le taugofie le fai ma faaola; ae suamalie lou faasaoina o se ola. E lelei ona agaleagaina ma ta’uleagaina tatou ona o le suafa o Iesu Keriso. Ua sili foi le sauāina ma amusia o oe ma a’u ona o le galuega faaola a lo tatou Alii.

E le afaina ona inosia ma teena o i tatou ona o le talalelei o le faaolataga. Fai mai Iesu, “e maua foi  outou e puapuaga i le laolagi, a ia outou lototetele, ua ou manumalo i le lalolagi.” (Ioa.16:33).

Ioe, e iai taimi ua taugā ai o tatou faafitauli ma ogaoga ai o tatou manu’a, ona tatou faavaivai ai lea ma ua pei ua mate se faamoemoe. Ae manatua foi tiga o si toeaina o Iopu, e le i gase ai lona faatuatua i le Atua? Fai mai Iopu, “Ua tatou talia mea lelei ma ile Atua, ae tatou te le talia ea ma mea leaga? “ (Iopu.2:10). Uso e, o faiga na a le Atua e saili ai lou loto nuu, ma lau amio Atua. Ae tua lelei. E tua i manū! Fai mai Iosefa, “o le Atua!”  O le Atua na auina mai a’u…” O le Atua na ia fai a’u ma pule.

O le Atua na ia fai a’u ma alii. O nei manuia ma lelei uma – o le Atua. O fea na amata mai ai? O lalo i le lua! (Ken.37:24). O le manatu o se tasi fai tofa o le Tusi Paia, O faavae tumau lava o aoaoga faale Tusi Paia, You would never be a somebody unless you become a nobody. Ioe, se ui mai ai Iakopo, Iosefa, Mose, Elia, ma Ioane le atalii o Sakaria. Sa faapea foi Nafanua, Tamasese, ma Eseta e pei ona mua’i ta’ua. Na auina  mai e le Atua nna perofeta ma lana savali o Ioane e muamua mai ia i tatou ina ia faasaoina tatou ma a tatou fanau.

Sa liutino taga foi le Atua ina ia faafoisia i tatou i le olaga mamā ma le lē ponā sa iai i le amataga. Samoa, ua uma ona maliu Iesu. Sa ama lava i ona faalavalava ma ona manu’a, ina ia saoloto tatou uma. E le i faapelepeleina lona ola, ina ia maua lou ola. 

Samoa, o lou taeao lenei. Ne i pei oe o e sa i le itu tauagavale o le faamasino. Ua le mau sisi’o. O anafea na matou iloa ai ua e fia ’ai? O anafea na e talosaga mai ai? O anafea na ou teena ai oe? (Mata.25:41-46).

O ai lava e te faia ma lou le ano iai, o Iesu lena. E manatua le mavaega a Asomua ia Tu’u’u, ‘E te faaifo le vaigauta ma faaa’e le vaigatai. A o le sala tutu, o ai lava e sulu atu ia te oe, ia ola lava. Samoa, o moomooga o le agaga, ia maua ni Iosefa e faaolaina o tatou tagata. Ia saga faaopoopo e le Atua le agaga alofa, e moni ai ona fai o oe ma faaola. Pe e te ta’utino atu nei i le Atua o le’a fai oe ma faaola i lana galuega ma ona tagata?

 

 Amene

7737063/7783782

© Samoa Observer 2016

Developed by Samoa Observer in Apia