O LA’U TALA FO’I

03 August 2016, 12:00AM

1. Matauina i Tala Fou se ulutala fai mai –“ua talosagaina e se kegi se nuu ina ia faamagaloina i latou……! O lea kegi poo se vaega a tamaiti-o i latou ia sa faia faiga faatautala i totonu o le Taulaga i tagata o le atunuu ma fao a latou meatotino. O le afioaga la o Vaimoso e faasino i ai lea Tala Fou-e pei ona talosagaina e ia tupulaga talavou -ina ia faamagalo i latou. Fai mai ua faapea foi ona faatoese ia tamaiti talavou i le atunuu atoa-aemaise ai i latou na afaina ia latou faiga faatautala.

E aliali mai la-ua uma ona ave manino e le afioaga o Vaimoso i ia tamaiti le mea o le a fai e le nuu ia i latou- pe afai e toe tulai mai nei mea mataga. Fai mai la o lea fono na fai i Vaimoso-sa auai le afioaga ma Leoleo ma fai mai- na faatoese ai ia tamati talavou taitoatasi i le nuu mo le faalumaina o le nuu-ma ua latou ta’utino ai-latou te le toe faia nei mea mataga ma le faatupu faalavelave.Ia-e aliali mai la-o lea ua amata mea le afioaga o Vaimoso i  lenei taumafaiga-ina ia taofia ai tupulaga mai le faatupu faalavelave ma le faatinoina o mea mataga e faalumaina ai o latou lava nuu.

E tatau la ona matua faafetaia le afioaga o Vaimoso-ona o lea ua latou faata’oto le ala tonu e tatau ona uia-ina ia faasaoina ai olaga o alo ma fanau uma o loo lalovaoa. Ia-e leai se tio i le tofa ua a’e i le afioaga-aua afai o Vaimoso sa taulamua-ma sa avea foi ma laumua o le Mau a Pule -ona o le sailia o se malo Tuto’atasi o Samoa-o lona uiga la-ua silafia lelei e Vaimoso le taua o le faatino o mea lelei i le taimi nei-mo tupulaga lalovaoa o Samoa! O le a sou taofi? 

2. Matauina foi ma le fiafia le faatautoina o le Peresetene fou o le Faamasinoga o Fanua ma Suafa-le Afioga a Fepulea’i Attila Ropati. E mafua la ona fiafia-ona ua tofia e le Atua se tasi ua loa ona tautua i le Atunuu ma lona Malo. Sa avea muamua ma Failautusi o le Fono Aoao Faitulafono a Samoa.

O se tasi o Loia agavaa! O lona uiga la-ua tatau ma talafeagai ai lenei tofiga mo Fepulea’i. Ia afai la o le Peresetene fou o le Safotulafai-ma o Letufuga-o lona uiga la-e le pine se tele o sona sao taua i mataupu a le atunuu! Ae o le mea sili-talosia ia avea le tulai mai o le Peresetene fou-o le a motusia ai le mea masani sa sau ai le Faamaisnoga o Fanua ma Suafa-o le ta’i fia tausaga o tatali se mataupu-aemaise ai lava aiga ma le mou atu ai o meatotino poo le tofi o le aiga! O le a sou taofi? 

3. Matauina foi i Tala Fou le teena pea e le Matagaluega o le Soifua Maloloina o le ulaula tapaa-e ui lava ina ua uma ona tuuina atu e le Malo- le isi laisene e faatu ai se isi fale sikaleti fou  i totonu o le atunuu. Ia –afai o loo teena e le Matagaluega o le Soifua Maloloina le ulaula sikaleti poo le tapaa-e mafua ona o mafuaga tau le soifua maloloina.

A tatou tilotilo la i le ata lautele- e sa’o le atugaluga o le soifua maloloina-ae a pe a lafo pea lea filifiliga i le tagata lava ia-poo le fea e sili pe o le ola soifua maloloina poo le ola auma’ia? Afai la ae taofi le ulaula sikaleti-o fea la o le a maua ai ni tupe a le Malo? A leai la ni tupe a le Malo-o lona uiga- o le loan foi le mea e soso’o ai-ae toe totogi e tatou uma! O le a la sou taofi? 

Matauina i Tala Fou o lea ua faatu e le Malisi St. Joseph sana Kalapu Taalo e toe faaolaola ai fusuaga e pei ona sa fai e le Kalapu Faipele a le Malisi i aso ua mavae. O le faagasologa la o le 45 tausaga o lea Kalapu i le tausaga talu ai-sa lu’i ai e le Palemia o Tuilaepa Sailele Malilelegaoi lea Kalapu- ina ia toe faaolaola mai aso ua mavae ma le manaia o fusuaga i totonu o Samoa.

O le Fusuaga (e pei o le Lakapi)-na faaulufale mai i Samoa e Felela Malisi-ma o le vaega malosi lea tau taaloga sa i totonu o le Pasefika i Saute (fusuaga)-ma o lea taaloga sa masani ona maua ai pine auro se tele a Samoa mai taaloga. O le ala lea o le a faamaopoopo ai e le Malisi ni fusuaga mo kalapu  i vaiaso taitasi mo le atunuu atoa-ma e amata ona fai resitala mo lea faamoemoe i le aso 1 o Aokuso…….! Ia-afai la o le tulaga lea o le a i ai-ma o le a toe tago le Malisi e fai fusuaga-o lona uiga la- o le a toe maua foi ni siamupini Samoa e pei o aso ua mavae! O le a sou taofi?

03 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>