Fa’afiafiaga fa’a-le-Aganu’u na maofa ai le to’atele sa i Tuana’imato

By Ilia L Likou 03 June 2016, 12:00AM

Tasi lea o vaega taua o le fa’amanatuina o le Tuto’atasi i tausaga ta’itasi, o fa’afiafiaga fa’aleAganu’u, lea na matua fuli ai afio’aga ma alalafaga, o a’oga ma fa’alapotopotoga ‘ese’ese mai le atunu’u, e matua sasae le mata-ole-aitu aua ta’ita’i o le atunu’u, o malo-fa’aaloalogia, o tagata asiasi mai fafo ae maise le lautele o Samoa sa ‘auai mo le sisiina o le tagavai i le Aso Lulu, le Aso 01 o Iuni ua mavae atu. 

E o’o lava i ta’ita’i o le atunu’u, Le Afioga a le Ali’i Palemia, Tuila’epa Sa’ilele Malielegaoi, na matua fa’amalieina lava ma fa’afetaia ai latou ona o tapenaga uma, e le faigofie. 

O fa’afiafiaga fa’aSamoa sa saunia e le Ekalesia Fa’apotopotoga Kerisiano Samoa mai Fa’ato’ia, o le ‘au-fa’afiafia mai le Ola-toe-fuata’ina, o le siva a le Kolisi a Lepa ma Lotofaga, o fa’afiafiaga ma le pese a le afio’aga o Leone mai Amerika Samoa, o le pese a Falealupo, o le siva a le Kolisi a le Ekalesia o le ‘Au Pa’ia o Aso E Gata Ai i Pesega, o le siva a le Kolisi o Amoa mai Salafai ma le pese ma le siva a le afio’aga o Fasito’o-uta.

Na fa’ailoa e le tama-a’oga o le Kolisi i Pesega o Junior Tofilau, ua matua fiafia lava ina ua avea latou ma se tasi o a’oga e fa’afiafiaina le mamalu uma sa ‘auai i le fa’amanatuina o le Fu’a i lenei tausaga. 

“Ae sa’o a? O se avanoa e le-‘aumaua, aua o ai na iloa pe na o le pau lenei o le Tuto’atasi o le a mafai ona ‘auai?” o lana tala fiafia lea e fai ma sui o le latou vaega sa fa’atalanoaina e sui o le Samoa Observer. 

 “Ae talosia ia saga maua pe ni avanoa o le matou a’oga e fa’afiafia ai i sisiga-fu’a i le lumana’i.” 

O le lagona lava lea e tasi e pei ona saunoa iai Toleafoa Ti’a Toleafoa o Fasito’o ma Tuana’i.

 “Mo fa’afiafiaga o lenei aso, ioe, e momoli lava la’u fa’afetai i le ‘au-fa’afiafia a uso ma tuafafine mai Leone i Amerika Samoa, o Upolu nei fa’apea nai fanau a’o’oga ma afio’aga na malaga mamao mai Savai’i. 

“Matua mata’ina ma manaia uma fa’afiafiaga ma siva pei ona va’aia.

“Pau lava si a’u fautuaga i le komiti o tapenaga, fa’amolemole se’i taumafai e galulue fa’atasi ma ‘au-siva ma vaega fa’afiafia, i o latou taimi fa’atulagaina.

“Ae soia le toe tauvala’aua atu i fa’aleotele-lea a-mea ua uma lo latou taimi – ia te a’u, e le-fa’aaloalo lena tulaga.” 

 “Ua matou fa’alogo fo’i e mafua ona leai ni tu’uga-fautasi ona ua le-fia ‘auai ‘au-va’a ae o vaega uma na o le fa’amanatuina o le Sisigafu’a, ae talosia ia toe fai tu’uga-fautasi i lea tausaga. 

O le tasi o vaega fa’amomoiloto o le fa’amanatuina o le tuto’atasi i lenei tausaga, o le taimi na fa’atino ai le ifoga fa’aleAganu’u a le Vaega o le Ola-toe-fuata’ina mai Tafa’igata, ma fa’ato’ese ai i le atunu’u. E matua to’atele le atunu’u sa i le malae na fetagisi i le o’otia ona o lea vaega. Ae na talia lea ifoga e sui o le malo sa ‘auai ma latou fa’afeiloa’i atu i le vaega matutua sa fa’atinoa lea fa’asifoga.

 O nisi nei o ata sa tapu’eina o fa’afiafiaga fa’aleAganu’u i le Aso Lulu, 01 o Iuni 2016 i le Malae i Tuana’imato.

By Ilia L Likou 03 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>