TALATUU MA TALA O LE VAVAU NA FAAMAUMAU E PAPALAGI

03 April 2016, 12:00AM

O LE TALA I LE LUPE E IGOA O LE LUPE MALAMALAMA

O le Lupe lenei ma le manu o le Fua’ō- fai mai talatuu na aumai mai le Lagi e fai ma meaalofa o le faaipoipoga a Sinalagilagi ma le alii o Lemalamatele, o le uso o lea alii o Tui.

E fiafia tele lenei Alii i le taaloga o le Seuga-lupe; ma o le pogai lea na tago ai ave ana lupe e tausi. Ona sau lea o lenei alii i Upolu e seu lupe. Na alu i luga o le mauga ma to ai lona fale i gauta o Satapuala; ma o le pogai lea fai mai na maua ai le igoa o Faleatiu-ona o iina na to ai lona fale.

Ona alu lea e seu lupe i le mauga- ma o le pogai lea na faaigoa ai lea mauga o le ‘Maugaotiu’. Ona alu lea o Tiu i Lotofaga i le Maugaoalii e seu lupe ai. O iina na felelei ese ai ana lupe ma nonofo i le va o Amaile ma Ti’avea.

O le pogai lea na alu ai i atumauga e latalata i le sami-ma na faaigoaina ai lea ogaeleele o ‘Sopoalemalama.’ Ona nofo lea o Tiu ma faatau atu ana lupe i le Tuiatua; ma o le pogai lena na maua ai ma nonofo lupe I Vaigafa!

O LE TALA I LE I’A NA I ATUA: Fai mai na sau le alii o Tautaifau a’o le isi ona igoa o Velova’ā, ma lana i’a e ave i lona tama o Tufuga i Asau; ona vala’aulia lea e Tuiatua Polailevao i Ma’ā; ona afe ane lea ma lana i’a i le fale a’o i ai le tama o Seleanamani.

Ona fai atu lea o le Tuiatua- e fai le i’a-ona tago lea o le tama ua sasae le tua lapalapa, ae pena le I’a. Ona te’a lea o le Ao o le i’a ia Saleaaumua, tu’u uso i totonu mo Ma’ā -ae ave le i’u ia Salefao ma lona itu.

Ona fesili lea o le Tuiatua-Pe o se atalii o ai le tama nei?  Ona fai atu lea o le isi tagata mai Lufilufi-“O lo’u atalii! Ona fai atu lea o Tuiatua-‘O ai le igoa o le tama? Ona fai atu lea o le isi tagata-o “Seleanamani”!

Ona toe fai atu foi lea o le Tuiatua-“Tu’u le igoa o Seleanamani, ae faaigoa ia “Seleselelimalelei” O le tama la lenei na faatoa mau ai le igoa o “Lufilufi”

 

O LE TALA IA TELA MA TAGALOA: O Tela o le alii tufuga o Atua, sa nofo i Ti’avea. O ia lea na faia le fale o le aitu anamua a’o po valea Samoa. Ua faasaga lea tufuga e fau le fale o le aitu sauā. Ua lua vaiaso o fai le fale.

Ona afio ifo lea o Tagaloa i le isi aso e eva-e alu atu la Tagaloa-o fai lava le galuega a le Tufuga-ua matua pa’ō lava. Ua fai ma faalavelave ia Tagaloa le pa’ō o le galuega a le tufuga. Ua fai le galuega o le isi itu o le fale.

Ona toe foi atu lea o Tagaloa ua matua ita lava i le tufuga. Ona fai atu lea o Tagaloa-‘Sole- o le a ‘ea le mea e te pa’ō ai –ua maloā lou pisa! Ua toe itiiti ona ‘ou fasia lea o oe-pe susunu foi le fale faatasi ma oe!

Ona tali lea o le tufuga-faamolemole  lau Afioga-“Ua ou mao i le pule ma le faaalo, ae o le a tuu le galuega ma le pa’ō- pe a uia le ala o le malo. O le mea lea ua ala ai ona tu’u galuega e fai latalata i le auala, ma o loo faaauau pea lea tulaga e o’o mai i le taimi nei.

A o ane ni alii i le ala a’o fai se galuega a se isi-ona taofi lea pe tuu le galuega o loo fai se’ia te’a ese tagata.

03 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>