Fautuaina Tupulaga e Fa’aaoga a latou palota

03 March 2016, 12:00AM

Fa’aliliu e Maiava

 

Ua tu’uina mai se fautuaga a le Fa’atonu o Polokalame a le Fono mo Tupulaga Talavou o Samoa (SNYC), o Taimalelagi Kaisarina Salesa,  mo tupulaga Samoa uma ua agava’a e palota, ina ia fa’aaoga a latou aia-tatau e palota ai i Faiga Palota a-taeao.

E ta’ilima tausaga ma faia palota a le atunu’u aoao ma o taimi fo’i ia ua iai isi auga-tupulaga fou ua agava’a mo le ulua’i taimi, e palota ai.

Pe tusa o le 20 pasene (tusa lea ma le 39,598 tagata) o le faitau-aofa’i o Samoa, e i le va o le 21 ma le 30 tausaga le matutua, ma o se vaega malosi fo’i lea o tupulaga talavou uma o le atunu’u.  

“Lea ua iloa, o lea fa’atinoga e foliga e tau-fa’afefe, e le malie ma iai fo’i nisi e le matua mautu po’o ai o le a palota iai ae maise le faiga o le palota, peita’i e fa’amalosi’Au atu i tupulaga talavou uma, ina ia fa’aaoga lenei avanoa taua e fa’aleo ai o latou lagona,” o le fa’aaliga lea a Taimalelagi. “Lea fo’i matou te iloa, e manatu ai tupulaga, e le taulia a latou palota, peita’i e fautua atu le Fono mo Tupulaga, ina ia sui ia ituaiga mafafauga. E taua atu lau palota nai lo le mea o mafaufau iai.” 

E anoanoa’i le mau fa’afitauli o lo’o a’afia ai tupulaga o le atunu’u, e pei o a’afiaga tau-soifua maloloina, o le leai o ni avanoa faigaluega, o popolega i fesuia’iga o le tau, o le saofaga i a’oa’oga maualuluga ma tulaga tau-seleni, o tulaga fa’aitu’au fa’ailoga-tagata ma le mativa le-tagolima. 

“Lea ua iai se avanoa o tupulaga talavou e filifili ai o tatou ta’ita’i, ta’ita’i lelei e fai ma o tatou sui ma ia palota mo tagata tatou te matua talitonuina e ‘au-mai ma tatou galulue fa’atasi mo le ‘ausia o o tatou fa’amoemoega mo tupulaga uma o Samoa.” 

Na fa’amamafa fo’i e Taimalelagi e fa’apea, “i le Fono a Samoa mo Tupulaga Talavou Aoao, o lo’o matou talanoa i ‘auala e galulue fa’atasi ai ma le malo fa’apea fa’alapotopotoga ‘ese’ese ma ‘autalavou i le atunu’u. E iai o matou sui o lo’o fa’atinoina nisi o galuega mata’ina e lagolagoina ai ma fesoasoani mo le atina’eina o le atunu’u i fa’alapotopotoga ‘ese’ese. O le fa’atinoina o palota, o se vaega lea o lea lagolago.”   

 ‘O se avanoa le-‘au-maua lea e fuafuaina ai le soifua au-i-luma, e fesoasoani ai i le fafauina o faiga-fa’avae tau tamaoaiga ma feso’ota’iga ma atunu’u i fafo, ae maise tulaga tau-si’osi’omaga, e saofaga uma pe a lelei ona fa’atinoina lau palota.

03 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>