“E tu’u sa’oloto foi outou e le upu moni”

By Rev. Petaia Setu 03 February 2019, 12:00AM

Ua tatou faalogo e le moni se mea malosi; ae malosi lava le mea moni. E leai la se mea e lilo I le olaga nei, e faaalia mea uma, auā e malosi lava le mea moni. Poo ai lava le poto ma le faafiamalosi, e gase lava. A o lē ua faalogo ma tumau I le mea moni, e tuu saoloto lava foi e le upu moni.

O loo tau faapupula e Iesu I loto femoumoua’i ma le le mautomu o Iutaia, sootaga faa-soo ma le olaga faa-soo, e tatau ona soifua ma ola ai le tagata ua talitonu ma talia Iesu Keriso o le Alo o le Atua Soifua I lona olaga. Ae iloa I fea le soo moni? A lē tumau I aoaoga ma ala o Keriso, e le mafai foi ona avea ma soo. E le mafai foi la ona iloa le moni pe a le o se soo. A o le soo faamaoni ua foeuli e le Agaga o le upu moni. A silasila Samoa ma faitau manino I le parakarafa nei, o iai lape o le sootaga lea faa-soo. O loo tautatā le tagata I ona tuāeleele faa-tagata soifua. O lona sootaga faa-tagata I le tagata, ma ona tapuāfanua faale siomaga. O le osiosiga o lona va nonofo ai I ona itū ma aga faa Iutaia, ua manatu ai e le sili a’e seisi I lo Aperaamo. O faavae tumau ia o le lotu Iutaia. Ua manatu lava Iutaia o mea uma o loo latou fai ua selau pasene ma atoatoa a o se tapuaiga ma se auaunaga ua faia ma le le iloa. O itu ia Samoa o loo afaina ai lou saolotoga faakerisiano, ma ta’u faalēatoaina ai la tatou auaunaga I le Alii. Ua tatou faamamapo tele I lo tatou va nonofo ai faale aganuu. Ua e taunapa I la tatou faa Samoa I ona tala’aga ma ou tuātagata, ona mimilo sesē atu ai lava lea o le talalelei ma foliga ai ua pule lava tatou i le upu moni. Faalogo foi I le taliupu a Iutaia, E le i pologa lava matou i se tasi. Fai mai Iesu, “Ua ou iloa o le fanau outou a Aperaamo, a ua outou fia fasioti ia te au!” Aisea? Pe le o le auaunaga lea ma le leiloa? Ua taotaomia le tagata I ona lagona faale natura o le siomaga, ua le mafai ai ona iloa, o le Alii lea o le faaolataga. Ua faapulou e le va tapuia  ma le va faa-tagata lou iloa, ina ia taofiofi mamau pea I lou sa’o faa tuātagata ma talitonuga fa’aanamua. Silasila pea I la tatou lesoni. O sē faia le agasala o le pologa lea a le agasala. (f.34). O le agasala, ina ua le usitai ma tumau i aoaoga a le Alii, ma ua tauaso ai pea I le mea moni.

O le upu moni, o le ola. O le ola, o Keriso ia(Ioane 14 : 6). 

O le avea la o oe ma soo moni o Keriso, e malamalama ai ou mata I le mea moni. O le mea moni e tatau foi ona a’oa’oina ai oe, o Iesu Keriso, o le Alo o le Atua Soifua. Soo se mea lava la e te iloa atu ai le mea moni, o lona uiga, o foliga na; o mamalu na ma paia o le Alo o le Atua Soifua.

I le, o lou tulaga faa-soo moni o le Alo o le Atua, o oe o le tagata molimau. O oe o le tagata tautala. Ua tataga mea uma ia te oe. O lea ua tuu saoloto oe e le upu moni ( Mataio 28: 18-20) Tautala! ‘Aua le poi I le mea moni. Faamaga! Momoli le upu o le faaolataga. E le osia ni va faa tagata ma va tapuia faa aganuu I taimi o le Atua. O taimi o le Atua, o avanoa ua tuu saolotoina ai oe e le Atalii, ona saoloto faamaoni ai lea o outou. Manatua o lou saolotoga o loo faafoe e le Agaga o le Atua  (2 Kori.3:17). Ia manatu I le upu lenei Samoa, e viia oe e tagata I lou tausi mamalu I le va nonofo ai faa aganuu; ae silisili ona viia oe e le Atua ina ua e iloa le mea moni ma tautala I le upu moni. Ua faapea le upu a John Wesley, ‘Afai e manu’a le loto o le tagata ma teva ona ua lavea I le upu a le Atua sa e laugaina, vivii i le Atua! Faafetai, ua aogā lau lauga’.

O tupu se mea faapea ia te oe? Amuia oe pe afai o inosia ma lamatia oe ona o le mea moni. Amuia oe pe afai ua tuli ma faamalōlō oe mai lau galuega, ona o lau molimau I le upu moni e ala I au galuega, ma lou lagalaga I mea sa’o ma mea lelei. Ua tatou iloa o mea ia ua uma ona a’oa’o mai ai Iesu ia I tatou uma. E inosia foi outou e tagata uma ona o lo’u igoa. Ioe, e fe’ai le alii o le lalolagi pe a oo ina maua e le amiotonu a le Atua. ’Aua le popole, e tasi lava lo tatou Atua. E le lua ni Atua.

Samoa, oka se manaia o ou faalogona pe a aafia oe I puapuaga ona o Iesu Keriso. Poo a lava leaga ma faiga taufa’amata’u, e to’a lelei ma mafanafana. Aiseā? Auā ua tuu saoloto oe e Keriso. A ia e manatua, ua le o se saolotoga faamāepaepa. E le o le saolotoga tausi mamalu, a o le molimau atu. E le o le gūgū, a o le faamanatu. Faamanatu I tagata uiga ma foliga paia o le Atua. O le Atua e alofa, e faamaoni, e onosai, e fai mea tonu, e mamā, e silisili ese, e faaola. A ’e lē tautala, e alalaga mai ma’a ma mea uma o le foafoaga! (Luka.19:40). A o oe o le so’o! Sena e, o soo o Keriso e le o ni soo I ta’aa’iga; a o le tagata atoa ua faaolaina. O le toetele o tatou, o kerisiano aganu’u. A o le ituaiga kerisiano la lea Samoa o loo fesaga’i ma le upu lea a Iesu, o sē faia le agasala, o le pologa ia a le agasala. E faapefea ona faasaoloto oe mai le faapagotaina e le agasala? A o ai e tatalaina ou noataga? E te le I lagonaina lava le alofa o le Atua ia te oe na fai ai o ia ma pologa, ina ia maua e oe le saolotoga?

Samoa e, ia fai oe ma kerisiano saoloto. O le kerisiano saoloto, o le soo moni foi lea. E leai se pa puipui o lana molimau I le faaolataga a Iesu Keriso. E le mā I le talalelei o le alofa tunoa. E le fiu I le tautala I le agalelei ma le alofa faaola o le Atua. E le fefe e faailoa le mea moni. E le vaivai e folafola le upu moni. Talia Iesu Keriso I lou loto. Faalogo I lona fetalai mai ma tumau ai I ana a’oa’oga mamana. O loo ia te oe lou lava saolotoga. O lau filifiliga tonu ma le sa’o e saoloto ai oe, ma manuia ai lau fanau, ma fiafia ai lou aiga. Tumau ia Keriso ma ola faa-soo moni o Keriso, ona malamalama lea o ou mata e te iloa atu ai le mamalu o le Atua (mea moni).

O le avanoa foi lea o lau molimau tuu saoloto mai le mana o le Agaga, e te tautala ai ma le lototele e tautino le mea moni. Laveai se ola o taotaomia I le pogisa ona o mea sesē ma le faavalevalea a le alii o lenei lalolagi. Ua ou vaavaai I le tele o tatou kerisiano faapea. To’a’aga I le lotu ma mea fai o le lotu. O foliga o fanau a Aperaamo. Ae maua loa sisi’o, faalii, fiti vale e su’e se au’upega e lafi ai. Ua fatu tala, ma tau tu’ua’i leaga. O ’e iloa o loo e pologa I le agasala? O ’e iloa o oe le isi pagota a le agasala?

Samoa, se’i vaai ane i lou olaga o aso uma pe le o faatautaia e le faitau fa’apaupau lea- Fai le mea lea ou te fai atu ai, ae aua le faia le mea lea ou te faia! O lou saolotoga  faa-soo moni Samoa, o Keriso, fai mai Iesu, Mulimuli mai ia te  a’u, ou te faia outou ma fai faiva i tagata(Mareko 1:17). Samoa e, ia iloa le mea moni ma failoa le upu moni. E tu’u saoloto foi outou e le upu moni.

 

 

Amene

Mobile: (685)-773-7063

(685)-7783782

By Rev. Petaia Setu 03 February 2019, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>