“O le avanoa e maua ai le ola e faavavau”

Tusia Rev. Petaia Setu ,

44 Hits

Rev. Petaia Setu

Rev. Petaia Setu

“Ioane.6:40”

E le maua fua se taui e aunoa ma le ausia poo le faamalieina foi o aiaiga ma tulaga e manaomia i soo se vaega o le olaga e pei o le tautua, o taaloga, o galuega, o aoga, ma nisi mea faapena o le soifuaga. E tauia i faamanuiaga e faaeaina ai. Ua uma ona aumai e le Atua taiala o le faaeaina i le ola faavavau ia Iesu keriso.

Muamua, o ē vaai i le Atalii.

O le mau a le atalii o Sepetaio, ua saili solo le motu o tagata ia Iesu. Ua le taulia i tagata le mamao ma taimi e alu ai, a ia vaai ia Iesu. Tainane lava e ese le uiga ma lagona o loo pu’e e Iesu e mafua ai ona naunau e vaai ma mulimuli atu ia te ia. O se lagona taua a o se agaga lelei tele lea pe a fua i avanoa ua maua.

O Kalilaia, o le itumalo lea ua sili ona tele ai o vavega ma faailoga ua faia ai e Iesu. Lea foi faatoa uma atu ona fafaga o le silia ma le lima afe tagata i le aso ananafi i falaoa e lima ma i’a e lua. O le ala foi lea o le tulituliloa pea e le motu o tagata e fia mulimuli ma fia vaai ia Iesu ona o nei faailoga tetele ma le ofoofogia ua latou vaai pea iai. Ua tele faailoga ma vavega e pei ona tā’ua; ae ua le o faaaogaina tatau e le motu o tagata nei le mau avanoa o loo vaai ai pea I le mamalu faaalia o le Atalii. Mai le isi itu o le vai I le isi itu, ao lea lava e tauanau Iesu i se isi faailoga(f.30)! Amuia Kapanaumi ua tele avanoa ua foaiina ai e le Atua lona Atalii e faaali tino atu ai o ia iā te i latou, e le gata i ana aoaoga, a o galuega foi e tele. Peitai ua le eseese le vaai I le faatalalē o Kapanaumi ma upu I le itulagi lea, Na o Neiafu na mele ai le to’elau. Auā o la Iesu I le aai nei o Kapanaumi, “…ana faia I Sotoma o vavega na faia ia te oe, po ua tumau ia ua oo inei ona po(Mat.11:23). O lau vaai i  Atua ua sili ona taua. ’Aua le vaai faaletagata; i lou manava ma tuinanauga o mata. A ia pupula lelei ou mata faaleagaga e malamalama lelei ai ou ala ma iloa atu ai faamanuiaga. 

Samoa, o lau vaai i le Atalii e te iloa lelei ai faamasino lou olaga o aso uma. A manino lelei lau vaai i le uiga paia o le Atua i lona soifua mai i lo tatou lalolagi ia Keriso Iesu lona Alo, ona mafai lea ona fetuunai o tatou faaletonu ma faataunuu o tatou tiute ma faiva ma faaiuga fai, e tusa ma le faamaoni o loo finagalo ai le Atua ia oe. Ua tele ina faaseseina i tatou ma tatou toilalo ai pea ina ua le mafai ona tatou vāai i foliga o le alofa na sauāina ma tuulafoaina, inosia ma fasiotia ona o oe ma a’u, a ua tatou vaavaai ifo lava tatou ia ia i tatou. Ua e manatu o oe o loo tu i le tofi; o oe ua poto; o oe ua maua mea; o oe e faapea ma faapea ona e faainaelo ai lea i le Alo o le Atua. Ua le oo lau vaai i le matagofie o le faaeaina i la le Atua. Ua e le iloa o faamanuiaga uma e mai le Atua. Ae faapefea le ola e faavavau? Po ua galo ia te oe le tagata sa aisi i le lalolagi nei ma le tagata na aisi i tala atu ole ola nei? (Luk.16:19-31). O le vaai gata mai. Ua puupuu le vaai ale mauoa i lona lava tagata ma ona autafa. Ua le afaina lana ’oa. Peitai, ua le iloa e lana vaai le Atalii ole tagata. E le o le ’oa la na alu ai i seoli a o lona le talia o Iesu Keriso i lana vaai. 

Uso e, o fea tonu o tulimata’i e lau vaai? E iloa ua sesē mamao i Sepania lau vaai i le sese o mea ua e fai. Toeitiiti leai se mea e le vevesi ma malepelepe i le atunuu. O totonu o aiga; o nuu ma itumalo. O faalapotopotoga ma sosaiete. O matagaluega eseese ma kalapu ma iuni, o ekalesia ma le malo. E foliga mai o lae lelei, ae matuā telē lava le faaletonu. O le ala felamata’i; ole fetōtōa’i; fe’aina’i; fefaaleagaa’i; fematea’i; lē femalamalamaa’i. Aisea? Sese le mea ua e vaai iai. Ua e vaai lava oe ia te oe. Ona tupu ai loa lea o manatu sese ma faufauga leaga ma fai ai pea oe ma pagota a le agasala, ma ua lilo ai te oe faamanuiaga, ua le mafai ai ona e maua le ola e faavavau. Fai mai Iesu, o le finagalo lea o lona Tama, ia maua le ola e faavavau e i latou uma o e vaai i le Atalii. E te iloa le vaai lea, o le vaai ua momomo I le alofa. Ua la iloa i le galuega faaola. Le vaai na te iloa le matelaina; le tagata ma’i ma lē ua mativa. Le tagata ua faapologa ma sauāina; ua le amana’ia ma aufuaina. E te talitonu e te mafaia ona laveai se isi ola e pei ona e vaai iai ile Atalii? Auā e lua lava mea, e misi loa ma le ola e faavavau, seoli loa. Fai mai Iesu “ Aua na faia e outou i le tasi o e aupito itiiti o o’u uso nei, o a’u lea ua outou faia iai”( Mat.25:40). 

Lua, o i latou ua faatuatua i le Atalii. 

E le vāvā mamao le vaai ma le faatuatua.  Auā o le vaai ua mautinoa e talia ai. A o le talia o le talitonu lena po o le faatuatua. A o le faatuatua, ole faalagolago lea i mea ua faamoemoe iai(Eperu.11:1).

E telē se taūa o le lolofi mai o le motu o tagata ma saili e mulimuli i le Alii. Aemaise lava, o le vaivaiga masani lea e pei foi o tatou, soo se mea lava e fai ma tumutumu ai, o meaai n ate faamasinoina le lelei ma le faaletonu. Peitai ua faamalamalama e Iesu le areto moni, o le areto lea o le ola, o ia lava lea. O lē sau ia te ia e le lāina ia. A ua silafia lelei e Iesu, na o na lolofi mai e vaavaai ia te ia, ae le o talitonu. O le faaletonu tele lena o loo taotaomia ai lo tatou ola faakerisiano. Na o na matamata ma vaavaai i galuega o le talalelei ona pau lea. E lolofi iai e matamata ma vaai ae lē talia i le loto. Tatou te lolotu ma fono tatalo i aso uma, a o le mea lava e tasi. O lē fea n ate faamatalaina lou faatuatua? O lau taulaga, po o au galuega lelei? Fai mai Iesu i le motu o tagata, o lenei le galuega a le Atua, ia outou faatuatua ia te Ia ua auina mai e Ia(f.29). Faatuatua i le Atalii.

Samoa, o le faatuatua lea o loo fetalai mai ai Iesu, o le fasiotia o lou tagata tuai ae fanau fouina oe iā Keriso Iesu(Ioane.3:5; 2 Kori. 5:17). Ua e mapo lotu ma mita’i solo lo tatou atunuu kerisiano, ae ua na o le pa’u ae oti le agaga. Afai tatou te faamoemoe i le ola, ua na o le Atalii e maua ai le ola. Peitai, e ao ina tatou talitonu ma talia Iesu Keriso i o tatou loto e fai lea ma lagi soifua o lo tatou faatuatuaga kerisiano. Na fetu’u e Iesu le aai o Kapanaumi ona o le tele o faailoga ma vavega sa fai ai e Iesu, ae tumau lava i le olaga tuai. Ae faapefea Samoa? Faapefea oe? Ua fia ni faailoga ofoofogia ma le matautia ua faaali mai ai le mamalu o le Atua ia te oe ma si o tatou atunuu? Na o  na maua lava o si to’a toe foi i lou olaga tuai a ea? Ae faapefea oe ma tua atu o lenei olaga? O fea e te maua iai le ola e faavavau? E maua i lou pepelo ma lou faaitu’au? Pe maua i lou malosi ma le poto o lau fanau? E tasi lava le moni o le faatuatua, o lē ua le toe usiusitai ia te ia lava ma ona manao, a ua ave lona satauro ma mulimuli ia Iesu i aso uma(Mareko.8:34). Ua inoino i lona tagata tuai ma lafoa’i lona lalolagi tuai ae faalogo ma usitai ma ola i poloa’iga ma tulafono a le Alii. O le faatuatua lena. Samoa e, o avanoa na ua aumai e le Atua mo oe ma tatou uma tatou te maua ai le ola e faavavau.

 

Amene

 

E-mail: petaiasetu@gmail.com

© Samoa Observer 2016

Developed by Samoa Observer in Apia