Leai se faasalaga mo le fatu moa na maua i totonu o le pisupo

By Lanuola Tusani Tupufia 02 September 2016, 12:00AM

O se kamupani Fiti lea e aumai ai le Pisupo o le Farmer’s Style Corned Beef-lea na ta’utino lo latou faaaogaina o fatu moa e avea ma mea e faaleleia ai le tofo, e le o faasalaina e le Matagaluega o le Soifua Maloloina. 

Na faaalia e le Faatonu Sili Aoao o le Soifua Maloloina o Leausa Dr. Take Naseri i le Samoa Observer e faapea e tusa ai ma le tulafono, e le mafai e le Soifua Maloloina ona tuuina atu se faasalaga. . 

 “Ou te le o iloa se tulafono,” o le faaaliga lea a Leausa.

“Ona pau o le mea ua fai o le toe aveeseina lea o ia pisupa. Matou te lagona ua talafeagai lea mea sese. E leai se faamoemoe e fai ai se mea leaga.” Na faamanino e Leausa e tusa ai ma le vaai a le Soifua Maloloina, afai e le o faalauiloaina ia fatu moa i lalo o le pepa o lea oloa, o lona uiga e leaga. O le itu lena ua faate’ia ai matou,” o lana faaaliga lea. “Tusa lava pe latou te fai mai o ni fatu moa, ae le mafai ona matou iloa –ona o lea sa i totonu o le pisupo ma sa latou faaaogaina.”

I le taimi nei, ua aumai e le kamupani a Fiti se uta o oloa fou tau pisupo-lea ua latou faa-talitonuina ai tagata lautele-e le o i ai ni fatu moa. Fai mai Leausa o lea uta fou o le a su’esu’eina e le Matagaluea o le Soifua Maloloina a’o le’i pasia.  Na ia toe ta’ua-o ia oloa fou e mai lea lava kamupani ma o le a faamuamua lo latou faamalieina o tulaga tau le soifua maloloina-“ona faatoa matou toe tuuina atu ai lea ia i latou se isi avanoa e faatau atu ai.” 

Ae poo a faasalaga o loo i ai mo lea kamupani, fai mai le Faatonu Sili Aoao-ua noatia i latou e totogi tau uma o le toe faafo’i atu o oloa i kamupani a le atunuu mo le faatauina atu. “O le mataupu lena e i le va o le kamupani ma faleoloa o le atunuu,” o le faaaliga lea a Leausa. O le aso 29 o Iulai 2016, fai mai le Faatonu Sili Aoao-na ta’utino ai e le kamupani le faaaogaina o fatu moa e avea ma mea e faaleleia ai le tofo. Fai mai Leausa i lea taimi o le a tuliloa e le Soifua Maloloina le toe teuteuina o le Tulafono o Taumafa

.Na logo le Matagaluega o le Soifua Maloloina-ina ua lipoti e nisi o tagata lautele se “taumafa e le masani ai” na vaaia i totonu o se Pisupo a le Farmer’s Style Corned Beef. 

O lea aano o manu fasi e le masani ai na ta’ua i totonu o se Suesuega Faa-Saienesi a le Faalapotopotoga o le Samoa (S.R.O.S.) e faamaonia ai lea mataupu. Ae ui o lea, e tatau i le faalapotopotoga ona toe tuuina atu le mataupu i le Soifua Maloloina-talu ai-e leai ni a latou mea faigaluega e faatino ai le suesuega o le D.N.A.

 I lalo o le Tulafono o Taumafa 2015, Vaega 2 Fuaiupu 7, O faamatalaga sese o taumafa o loo faaalia ai e faapea: 

1) e le tatau i se tagata ona faamatala sese taumafa ua fuafua mo le faatauina atu.  

2) E le tatau i se tagata ona faatau atu taumafa ia e tatau ona matua iloa e le tagata o loo sese ona faamatala poo e ono tulai mai ai le afaina o le malosi o se tagata o ia lea e faalagolago i luga o lea faaamatalaga. 

3. o se tagata na te soli le faafuaiupu (1) ua na faia se solitulafono ma e ono noatia ina ua faamaonia e nofosala-i se salatupe e le sili atu i le 8,000 iunite tau faasalaga poo i le nofo i le falepuipui mo se vaitaimi e le sili atu i le tolu (3) tausaga, poo faasalaga e lua.

By Lanuola Tusani Tupufia 02 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>