O LA’U TALA FO’I

02 September 2016, 12:00AM

1. Matauina i Tala Fou se ulutala fai mai:-“Ua faaleaga ma faatama’ia le Tuugamau o Robert Louis Stevenson-poo Tusitala- e pei ona silafia ai e Samoa. Mo i latou la e le o silafia le nofoaga o loo i ai le tuugamau o lenei Uo ta’uta’ua ma le alofa a  Samoa o “Tusitala”-o lenei tuugamau o loo i luga o le Mauga o Vaea.

O le mea la ua tupu i le tuugamau o Tusitala e pei ona faaalia i Tala Fou-fai mai ua faaleagaina. Ina ia mafai la ona e o’o i lenei tuugamau-o loo i ai le auala savali i luga i lea nofoaga-e afua atu i Vailima. O lona uiga-afai e te fia o’o i ai-e te alu i Vailima-ona e maua ai lea o le auala i luga o le Mauga o Vaea-o loo i ai le tuugamau o Tusitala. O lea la auala i luga i le tuugamau-o se meaalofa lea na fai e nisi o tamalii ma faleupolu o Samoa-mo lenei tagata alofa ia Samoa-o Tusitala.

O upu faamauina a nei tamalii ma faleupolu o Samoa-na mafua ai ona latou faia lea ala savali i luga o le Mauga o Vaega…….fai mai-“Ua matou saunia lenei meaalofa e le pala-mo le uo pele a Samoa. E manatua ai lona alofa ia i matou –a’o faa-falepuipui i matou e Malo Tetele mai fafo….! Afai la o lea-ua tatau ma onomea le le fiafia o le alii o Matthew-talu ai –“afai o se tagata na alofa ia te oe mo se faata’ita’iga-e faapefea la ona e taui atu lea alofa? O le a sou taofi?

2. Matauina foi i Tala Fou fai mai o loo fai su’esu’ega e uiga i gaoiga- ia sa faatino i masini e tala ai tupe-poo ni tupe na aveese mai Masini Tala Tupe i se faiga solitulafono. E to’alua-ma le isi e to’atasi o loo masalomia-o ni tagata Saina na taunuu mai i Samoa mai Fiti i le amataga o lenei masina-ma sa nonofo i se fale talimalo i totonu o le atunuu. Fai mai o le to’atasi o i latou ia-ua tuua le atunuu. Fai na maua lea tulaga faaletonu ina ua mae’a se toe iloiloga e le faletupe-o tagata o loo faaaogaina ia Masini Tala Tupe….!

O le faiga na fai e ia tagata-sa latou faaaogaina se masini e toe fai ai pepa e tala ai i tua tupe. O le faiga lea na latou mafai ai ona maua numera o pepa tala tupe-e ave ai i fafo tupe…! Fai o loo saisai le to’alua o ia tagata ma o le a tula’i i luma o le Faamasinoga i le aso 12 o Setema…! Ia-o faiga na a tama sasa’o mai fafo ia ua tumu ai nei le atunuu-ma afai la o le pogai lea e ala ai ona o mai nei tagata i le atunuu-o le a le manuia o le atunuu e maua ai?

Afai foi e falepuipui le tagata Samoa i le gaoi o le $10-o le a la le mea e tatau ona fai i nei tagata? Ia atonu o lea ua faamaonia iinei -le popolega o nisi o le atunuu-i le soona aumai o nei tagata Saina i Samoa. Ia manatua la-e ala ona o mai tagata nei i Samoa-ona ua latou iloa lelei lava-e na o Samoa lava e sao ai a latou faiga! Afai la ae faamaonia le solitulafono o nei tagata-o le faiga la e tatau ona fai i ai-o le faatino o le tulafono ma le amiotonu- ae le o ni polokiki! O le a sou taofi? 

3. Matauina pea le esese o finagalo o le atunuu-fai mai nisi o loo lelei mea uma-ae fai mai isi ua faigata le soifuaga…….! Ia o le aia tatau lava lena a le tagata ia-ae ia manatua lelei la-afai e moni ma faamaoni o loo lelei mea uma-ia faafetai i le Atua pe afai e moni lea. Ae afai e le moni lea talitonuga-ia- o le upu lava a le atunuu-“O le a tautala lava aso…! Afai la o lelei-o lona uiga-o le lelei o mea uma-e amata mai le tamaoaiga o le aiga, aoaoina o le fanau-o le mafai ona faafoe o soligatulafono e pei o le gaoi ma le faatupu faalavelave-toso teine ma isi lava mea.

O le manuia foi e faasino i le amio pulea o fanau ma tupulaga talavou i totonu o nuu ma le tele lava o isi mea. Ae o le mea e sili ona taua-“o le ola faale-agaga o le aiga-ina ia mafai ai ona taofia fanau mai le aafia i mea leaga-aemaise ai le maua o le a’oa’oina moni-e ala i le ava ma le usita’i i matua-e faalevalevaina ai o latou aso! O le a sou taofi?

02 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>