Fa’amatala e se tama le suiga tele ua i ai lona soifua

By Fa’aliliu e Maiava 02 July 2016, 12:00AM

Ua le-lava e Matemini Taulafo onosa’ia le tulaga fa’aletonu ua fa’asolo iai lona soifua. 

E tasi lava la le mafuaga o lana fa’ai’uga e ‘auai i le Ekalesia mo Fa’amalologa ia Ianuari, o le fia fa’apauina lea o lona mamafa!  

Mae’a le sefulu vaiaso, ua 14.8 kilokalama ua pa’u mai le 127.6 kilokalama sa iai muamua. E le gata la ua ‘ausia lona fa’amoemoe sa fa’ananau iai, a ua avea  o se la’asaga e finau atili ai ma manumalo i le tauvaga atoa.  

O le vaiaso talu ai, na fa’amae’a ai le taumafaiga fa’amalosi-tino lona sefulu a le Ekalesia mo Fa’amalologa na amata ia Ianuari 2014 lea na toe manumalo ai fo’i Matemini Taulafo ma siamupini fa’alausoso’o ai.

E 19.7 kilo na pa’u i totonu o le 20 vaiaso o polokalame fa’apa’u-pauna e lua.

Na fesiligia i le mafuaga o lona malo, ae saunoa: “O suiga!”

 “O le lu’itele mo a’u, e le o le fa’apa’uina o lo’u mamafa a’o le sui o le va’ai i mea’ai  ma mea-inu ‘ou te ‘aia ma ua ‘avea ai o se suiga tele o lo’u olaga, aua o mea lava nei o lo’o fa’aleagaina ai le tagata. 

“Ua ‘ou iloa ai fo’i, o mea lava fo’i nei o le a fa’aauau pea ona avea ma fa’atupu ma’i ia ‘au, tusa lava po’o le a le mamafa ua iai lo’u tino.”   

O le tasi la lea o mea na tonu ia Matemini ia suia, o lana inu (‘ava), ae le pei la o le to’atele e taumafai e na ona tau fa’aitiitia le inu, a’o Matemini la, ua mana’o e tu’u-sa’o lava le ‘ava.  

 “Ina ua fa’asoa mai le Faife’au (o la’u Faiao’ga fa’apitoa fo’i lea) o Lenny Solomona, i le fa’aleagaina o le ate-pili e le pia, ma fa’aalia fo’i ata o ate-pili maloloina ma ate-pili ua afaina ona ole ‘umi o inu-pia, sa ‘ou va’ava’ai lelei iai ma fa’apea, ua lava, o le a le ou le-toe inu.”  

E to’atele ua fa’aosofia e Matemini, ina ia fa’atauaina le ola ua maua peita’i na ta’ua, o le fiafiaga sili ia te ia, ona o suiga o lona olaga ua iai, ua tele ai fo’i suiga ma va-va-lalata ai le mafutaga i lona aiga.   

“Ua sili atu le alofa o lo’u to’alua ia ‘au, e le ona o le suiga ua iai nei po’o tupe fo’i na malo ai; ae ona ua avea a’u o se ta’ita’i malosi atu i lo’u aiga e ala i le faia o se fa’ata’ita’iga lelei mo ia ma le ma fanau,” o lana fa’aaliga lea. 

O le fa’anauauga fou o Matemini, o le toe fa’apa’uina o se isi valu kilo. 

“O lo’u fa’amoemoe, ‘ia pa’u ifo i le 100 kilo lo’u mamafa ae o le a fai loa i le ‘auala sa’o.” 

O le uiga o lea tala, o le a taumafai e fa’aaoga ta’iala ma talitonuga na a’oa’oina ai e le lona aiga o Fa’amalologa & Koleniga (1 Touch).

“Na fa’asolosolo malie lava le pa’u o lo’u mamafa, e i lalo ifo o le kilo e pau i se vaiaso; ma manatu ai fa’apea: O a a’u mea e ‘ai, o le taimi e ‘ai ai, ae fa’afia fo’i ona ‘ai i le aso atoa.” 

Ae maise fo’i le faia o fa’amalosi-tino. 

 “O le fa’amasani o lo’u tino e koleniga ua fa’aopooo ai lo’u malosi, ua malo ai o’u ponaivi ma lagona ai lou le lava o la’u manava i le taimi nei nai lo le taimi sa ta’alo ma finau i ta’aloga.”

Ina ua ‘auai le ali’i i le tauvaga muamua, na ia matauina se tulaga ‘ese.

“O le isi tulaga o le lu’i na ‘ou fiafia tele iai mo se suia o lo’u olaga, o le Faife’au lea o Lenny ma le faletua o Tai Solomona ma le fesoasoani tele i le ‘aumaia o mau fa’aleTusi Pa’ia mo le soifua maloloina, e fa’atauaina atili ai le lu’i lea.”   

Saunoa le faife’au, o mau-fa’aleAgaga nei fa’atasi ma le tatalo, o vaega ‘autu ia aua o le to’atele o tagata e fa’amoemoe i lo latou malosi fa’aleTagata, e masani lava ona vave mumusi ma fa’ama’amulu i taimi tigaina ma faigata.

“O se lu’itau, lona uiga, e le faigofie peita’i o lo’u mana’o lava e o’o mai i aso uma e ui ina faigata, o le fa’amalosi’au mai o faia’oga e ala i le ‘Upu  a le Le Atua ma o le taimi lava e mae’a ai koleniga, matou te potopoto fa’atasi e tatalo ma momoli le fa’afetai i Le Atua ona o le malosi ua Ia foa’i e fo’ia ai fa’afitauli uma.”  

Ua mae’a le lua a Matemini i le Luitau lea ae  o lo’o fa’aauau pea. “E matua leai so’u manatu e toe o’o i le mea sa iai muamua. Ioe, ua suia atoa lo’u tino ae silisili ona taua le suiga tele o lo’u olaga ua iai!”

By Fa’aliliu e Maiava 02 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>