Maliu se tama’ita’i ina ua oso i fafo ma se ta’avale

By Pai Mulitalo Ale 02 July 2016, 12:00AM

 Ua tu’uina atu nei e Leoleo se fa’amanatu i le atunu’u, ina ‘ia mataala ma mafaufau lelei i taimi uma, ma taumafai e ‘alo’alo-‘ese mai le faia o fa’ai’uga a’o to’atama’i. 

O lea lapata’iga na tu’uina mai a’o latou su’esu’eina ni maliu se tolu sa iai i le vaiaso ua mavae. O le tasi o ia malie, o se tama’ita’i talavou na oso-‘ese mai se ta’avale a’o alu i le ‘auala-tele ma i’u ina maliu mulimuli ai i le falema’i. 

Na fa’amaonia mai e le So’o-‘upu a le Matagaluega, o Maotaoali’i Kaioneta Kitiona lea fa’alavelave ma ta’ua ai le molia ai nei o se ali’i e 25 tausaga le matua ona o le fa’alavelave na tupu. 

O lo’o molia lea ali’i le ‘ave-ta’avale fa’atamala ua mafua ai le maliu o se tagata.

Na ta’ua e Maotaoali’i, o le to’alua lea sa aga’i mai Lefaga i Apia i le Aso To’ona’i talu ai, ae tupu ai se fa’alavelave ma oso-‘ese ai le tama’ita’i 22 tausaga lea mai le ta’avale ina ua o’o mai i Aleisa.

Sa fa’anatinati atu i le falema’i peita’i na maliu i le aso na soso’o ai ona o le tuga o manu’aga o lona ulu. 

O le fa’alavelave lona lua, na maliu ai e tamaitiiti e tasi le tausaga mai Falealili. 

Na fa’aalia e Maotaoali’i, ua molia nei fo’i se tama e 45 tausaga i le ‘ave-ta’avale fa’atamala ua mafua ai le maliu lea, ina ua so’a e le ta’avale lea ma le-tu i se fa’alavelave na tupu i le Aso Sa talu ai. 

O le isi fa’alavelave, ua molia ai se tama e 59 tausaga ona o le maliu ai o lona tama e 83 tausaga le matua ina ua oso i tua le la ta’avale ma feto’ai ma se pou-moli. 

I ripoti a Leoleo, na fa’anatinati atu le ua maliu ma lona atali’i e fia ‘auai i se fono a le nu’u. A’o aga’i atu le ta’avale, na le-mafai e le ‘ave-ta’avale ona fa’atonutonu le ta’avale ma oso ai i tua na mafua ai ona feto’ai ma le pou-moli ma maliu ai le toea’ina. 

Saunoa Maotaoali’i, o fa’alavelave ia ua lapata’ia ai le mamalu o le atunu’u, ina ia nofouta lelei ma mataala i le faia o fa’ai’uga lelei ae maise i le taimi e ‘aveina ai ta’avale i luga o ‘auala-tele.

“Ioe le mamalu e, o ‘ave-ta’avale, o ou a’ao o lo’o iai le soifua o tagata, se’i alolofa, ia tautuana. 

“Ua matauina fo’i, o nisi fa’alavelave e tutupu, a’o feagai ma le loto-ita. Fa’amolemole, fai-fai-malie ma ‘aua le faia ni fa’ai’uga le-talafeagai a’o tumu lou loto i le ita.”

O le a tula’i uma ‘ave-ta’avale nei i luma o le Fa’amasinoga, i le Aso 07 o Iulai, 2016.

By Pai Mulitalo Ale 02 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>