Lapata’i le Faletupe e fa’asaga i le One Coin

240 Hits

O ai e te maufaatuatuaina?  

E te maufaatuatuina tupe o lo’o lolomiina ma faasafua atu e le Faletupe Tutotonu e tusa ai ma ta’iala o le tulafono?  Pe e te maufaatuatuaina ni tupe initaneti na gaosia i luga o le initaneti, lea e faasalalau e tagata e faafoliga e faigaluega i le OneCoin poo le Bitcoin, e le o ni tupe faitino, e leai foi ni tulafono e aiaia? O ai o le a e talitonuina?

Ua tuuina atu e le Faletupe Tutotonu se lapataiga e faatatau i le faatupulaia o faalauiloa i pisinisi tau tupe initaneti i totonu o Samoa. O tupe initaneti, e ese mai i tupe faitino lea ua tatou masani ai e pei o tupe pepa nei: $100, $50, $20, $10, $5 tala poo tupe siliva. O tupe initaneti, o ni tupe na fausia i totonu o polokalame faa-komepiuta, ma e na o ni fuainumera lava e mafai ona e silasila iai, e le o ni tupe faitino.

Ua oo mai i le Faletupe Tutotonu faamatalaga e faapea, o loo iai faalauiloa a se Kamupani e taua o le Onecoin poo le Bitcoin, o loo faasalalau i le taimi nei i totonu o Samoa.  O loo faailoa ai ma unaia ai tagata e saini pe tatala se teugatupe ma faatau ai tupe initaneti.  O nei tupe initaneti e mae’a loa ona faatauina ona alu ai laia o le tau (value) aga’i luga. Faata’ita’iga, a e alu ma sau tupe e afe tala e faatau ai tupe  initaneti, a mae’a se piriota faatulagaina ona faasefuluina laia o lau tupe. $1,000 tala faatele i le 10 maua ai le $10,000 i totonu o se piriota e na o le 6 masina, mo se faataitaiga.  

E fautuaina malosi e le Faletupe Tutotonu, o lea faiga e matua maaleale lava, ma o tagata o le a teu faafagialuega ai a latou tupe, o le a leiloa ma maumau a latou teugatupe.  O le itu e sili ona leaga mo tagata Samoa, o le taimi lava e leiloa ai lau tupe, o lona uiga e tele foi le avanoa e le toe maua ai nei tupe.  E lē fautuaina e le Faletupe Tutotonu le faaaogaina o se pisinisi tau tupe initaneti ona e maualuga le tulaga maaleale mo tagata lautele. 

Ua faamaonia foi e le Faletupe Tutotonu mai nisi o sooupu faatuatuaina a le aufaasalalau e faapea, o le tagata na amataina ma le ofisa autu o le Kamupani lenei a le Onecoin o loo i totonu o Bulgaria, na osofaia e leoleo a lea Malo, o se vaega o ‘faiga tuufaatasi faatafatolu tau tupe fai faaonaponei e faaaoga ai tupe initaneti.  

Ua faasaina foi le Onecoin i atunuu e pei o Siamani.

E iai nisi oi latou ia e faalauiloaina tupe initaneti na fesootai mai i le Faletupe Tutotonu e talosagaina le faamaoniga mo a latou pisinisi ma oloa; peitai e lei mafai ona latou faamalieina uma aiaiga a le Malo e ala i le tuuina mai o faamatalaga talafeagai mo iloiloga mae’ae’a (lea e matua vailiili ai e le Faletupe Tutotonu se kamupni ma ana oloa) pe afai matou te lē mauaina uma faamatalaga e fausia ai se faaiuga anoa.  O le i’uga, na teena e le Faletupe Tutotonu e fai ai ma sui o le Malo le faamaoniaina o ia pisinisi.  

I le tulaga o le Faletupe Tutotonu o ia o le Pule Faatonu o faalapotopotoga tau tupe i totonu o Samoa, e matou te lē mananao e faasa ni pisinisi fou e manuia ai tagata Samoa faapea lona tamaoaiga; peitai, o soo se pisinisi fou e pei o tupe initaneti (tupe faaonaponei e faaaoga ai faiga faatekonolosi poo le cryptocurrency), e iai lava itu maaaleale e aofia ai.

O Tupe Initaneti e na o ni fuainumera ma e foliga o loo malupuipuia ai lou tupe. E lavelave tele le faatinoina o lea faiga, ma o se tasi lenei o mafuaaga e tatau ona ‘alofia ai Tupe Initaneti – e lavelave le faatinoina ma e malamalma gatā, e o’o lava i le tagata o loo faasalalauina le pisinisi poo Tupe Initaneti. 

O le tulaga o loo iai Tupe Initaneti i le taimi nei e le o faatulafonoina, ma e faigata ai ona fai ni taiala e puipuia ai tagata lautele.  O le leai o ni tulafono e aiaia ai Tupe Initaneti, o le a avea ma se tasi o vala tāua e tosina mai ai le au taufaavalea ma le au taufaasesē.

O le taimi nei, e le o lava faamatalaga ma polokalame faalauiloa mo le atunuu i le tulaga o loo faagaoioi ai nei ituaiga pisinisi. O se tasi nei o mafuaaga o le a tata’i seseina ai tagata lautele o le atunuu e faia ni faaiuga sese ona o le maufaatuaina ma le talitonuina o faaupuga faatosina nei: ave lou tupe i le OneCoin ona ‘e te mauoa vave ai’.  O le mau’oa vave o se mailei iloa gatā lea o loo faaaoga e tagata taufaasese e uga ai lau tupe.

E fautuaina malosi e le Faletupe Tutotonu le mamalu o le atunuu lautele ina ia nofo uta ma mataala i nei faiga faapisinisi.  E foliga mai o se teugatupe faatosina e maua ai ni tupe se tele i se taimi vave, peitai, e i’u ane ua leiloa ai au tupe e tele na alu ai lou afu e su’e e aunoa ma se avanoa e mafai ona toe maua ai.  E na o se fesili lava e toe autalu ai lenei faasalalauga ina ia toe fetuutuuna’i ai le tofa: O ai e te maufaatuatuaina?  O ai o le a e talitonu iai? E mafai ona e maufaatuatuaina se pisinisi e leai ni tulafono e aiaia ai, leai foi ma se tulafono e puipuia ai oe ma lou tupe pe a leiloa?  Pe e te maufaatuatuaina le Faletupe Tutotonu o loo puipuia le mamalu o le atunuu e tusa ai ma ala o le tulafono?

Afai ae moomia nisi faamatalaga e faatatau i lenei mataupu, faamolemole, faafesootai le Vaega o Sueseuga Faapitoa o Faamatalaga Tau Tupe i le Faletupe Tutotonu o Samoa.

© Samoa Observer 2016

Developed by Samoa Observer in Apia