O ali’i pagota e to’alua lea sa sosola ese mai le to’ese i Tafaigata i le fa’aiuga o le masina na se’i mavae atu nei lea ua toe fo’i ane i Tafaigata i le vaveao o le Aso Lua.

I le fa’atalatalanoaga a le vasega o le au Tusitala ma le sooupu o le falepuipui le afioga i a Ulugia Niuia Aumua sa ia ta’ua ai o nei ali’i na toe fo’i atu lava i lō laua loto malie.

O nei ali’i o lo’o tuli o laua fa’asalaga i le toe’se i moliaga o le talepe fale, gaoi ma le fao meatotino.

O laua nei o Fili Faulalo, 34 tausaga mai Leulumoega Tuai ma Tui Samuelu, 24 tausaga mai Falelauniu, Manono ma Vailoa Faleata.

“O le vaveao o le Aso Lua pe tusa ma le 4:30 sa toe fo’i mai ai tama ia e to’alua,” o le saunoaga lea a le sooupu.

“O le tulaga o le o’o mai o tama nei masalo o se tala uiga ese fo’i lea i le atunuu e fa’ailoa ai le tatou aganuu ma le agaifanua aemaise fo’i le tulaga ese o le amanaiaina e le atunuu o le fa’atalau’ula atu a le matagaluega mo se fesoasoani.

“O lesi tama na sau lava ia i luma o le faitoto’a i le vaveao,a’o lesi sa ta’amilo ane i tua ona a’e mai lea i le pa ma toe sau ai I totonu.

“O le tulaga na sa i ai.”

Sa fa’aalia fo’i e Ulugia o le fa’amatalaga a nei taulele’a sa i a i laua le fefefe o le ala lea na toe fo’i ane ai.

“Ua omai fai mai ua fefefe i le tulaga ua sailia ai e Matagaluega a Leoleo fa’apea ai ma le Falepuipui laua talu ona oese.

“E avea ai lenei avanoa e momoli atu ai le fa’afetai tele lava i le atunuu, nuu ma alalafaga sa soalaupule i tulaga ia i le latou fesoasoani.

“Aemaise le Ofisa o Leoleo le afioga i le Komesina ma le pulega lea sa gapatia i le tau sailiga o pagota ia talu ona sosola.

“O le agaga fa’afetai fo’i i le atunuu ona o le lava papale ou te iloa lava le telē o le fa’anoanoa o le atunu’u ae faafetai ona o lea ua toe omai tama ia.

“O le tulaga lea ua i ai o lea o lo’o fa’atalia le Ofisa o Leoleo auā su’esu’ega masani ma moliaga o tama ia i le sosola ese mai ai i totonu o le falepuipui.”

Sa fesiligia fo’i le so’oupu i le tulaga lea pe sa i ai ni fa’afitauli na tutupu mai i le taimi ao’o i ai nei pagota i tua.

“E pau le vaega sa matou soalaupule ai ma le Ofisa o Leoleo ma pei e mautinoa e fa’apea sa i ai se fale na satia i se vaega o Ululoloa.

“Ae o lo’o maua i le ofisa o leoleo ia fa’amatalaga auiliili pe sa i ai nisi tulaga po’o nisi nofoaga sa aafia.

“E matou te le’o suesue teleina ia pagota nei ona e matou te le’o manana’o e afaina suesuega a leoleo o lo’o fa’atali.

“Pau le tulaga lea e i ai i le taimi nei o lo’o taofia i totonu o le pasima e le mafai ona toe tatalaina mai se’i vagana ua saini le Komesina o falepuipui e tatalaina mai i fafo ona fa’atoa tatalaina mai lea.”

Sa fa’aalia fo’i e Ulugia o le taimi nei e le’i maua lava le ali’i i a Uili Manuleleua lea sa to’afa i ai pagota lea na sosola ese mai i Tafaigata a’o le’i faia le Kerisimasi.

“O le taimi nei o lea lava matou te galulue fa’atasi ma le Matagaluega a Leoleo i le sailiga o le ali’i i a Uili Manuleleua.

“E le mafai ona so’ona fai atu se fa’amatalaga i le tulaga lea ona o lea lava e fai matou galuega i le tau sailiga o le taule’ale;a nei.

“Ae afai e te silafia se nofoaga o i ai lenei alii fa’afesootai ane le telefoni a le matagaluega a leoleo i le 22222.”